DAGHANG gustong madato, ug kon mahimo, madato dayon. Ang uban gusto pa gyud nga mahimong mga milyonaryo. Kinsa ba guy ganahang magpabilin nga kabus ug mag-agwanta og suwa og ginamos, buwad, hipon, amahong, tinabal ug lawlaw? Busa, daghan kaayong nangailad sa mga “get-rich scheme” ug “double-your-money-scheme.”
Ang uban sigig palit og ticket sa lotto sa pamasin nga makaigo sa jackpot ug mahimong milyonaryo. Pero matod pa lagi sa mga batid sa mathematics, mas dako pa ang purohan nga maigo kas kilat kay sa makaigo ka sa jackpot sa lotto.
Bisan pa gani kadtong naigo na sa kilat wa gihapon kadaog sa lotto. Pero ang nakaayo kay 50 porsento sa kita sa Philippine Charity Sweepestakes Office (PCSO) adto man padung sa mga kabus pinaagi sa hospitalization ug tambal.
•••
Apan dunay laing paagi nga mahimo kang milyonaryo. Sumala sa Bureau of the Treasury, mao kini ang “prize” bonds nga ilang ibaligya sugod sa buwan sa Disyembre sa tag P500 ang matag ticket.
Mao kini ang investment nga dunay premyo. Pareho kini sa premyo savings bond niadtong 1970s. Way interest ang maong bonds apan human sa usa ka tuig, ang imong investment nga labing menos P500 imong mabawi.
Sud sa usa ka tuig, duna kay kahigayonan nga mahimong milyonaryo kay dunay may raffle matag buwan ug ang premyo gikan sa P20,000 ngadto sa usa ka milyon ka pesos nga malabo. Tax-free pa ang premyo.
•••
Kadtong mopusta sa mga illegal numbers game sama sa swertres ug masiao, goodbye ang gipusta kon di makadaog. Apan sa prize bonds, di mawagtang ang imong gipalit nga bonds nga tag P500. Apan way interest.
Si National Treasurer Rosalia V. de Leon niingon nga ang prize bonds mapalit pinaagi sa Development Bank of the Philippines ug Land Bank of the Philippines. Apan ila pang giandam ang mechanics alang niini.
Ang usa ka ticket tag P500. Mas daghang ticket mas dako ang purohan nga makadaog. Pero ang imong kwarta di mawagtang, di sama sa swertres ug masiao nga adto padung sa mga financiers.