GAWAS sa chicharon nga maka-high-blood, ampaw ug locally made nga mga sapatos, ang dakbayan sa Carcar, nabaniog usab sa kalami sa ilang lechon. Mao nga daghan ang maikag nga motilaw sa ilang lechong baboy. Naa say kalderetahan duol sa merkado, lami sab kuno. Mao nga bisan may gilay-on ang maong dakbayan gikan dinhi sa dakbayan sa Sugbo, adtuon gihapon kini sa mga tawo aron adto mokaon.
Pero karong bag-o (actually dugay na ning maong mga reklamo) nabaniog sa social media ang reklamo sa pipila ka mga kustomer kabahin sa binoang sa pipila ka mga namaligya og lechon, labi pa sa merkado. Dugay na pod ko nakadawat ning susamang reklamo apan, wala lang nako matagad sa akong tulumanon sa radyo o dinhi sa atong lindog kay wala man god magpa-ila ang mga nangreklamo. Basin og pagdaot lang sa kakompetensiya sa negosyo.
Pero karong bag-o diha na gyoy pormal nga reklamo nga migawas sa social media nga nabiktima sa pipila ka mga namaligya og lechon sa maong dakbayan. Tiaw ba kanang ang bahaw nga lechon, buot ipasabot nga kagahapon pa, ibaligya pa diay nila. Ang ilang biktimahon kanang mga passersby o moagi lang nga mga kustomer kay manguli o mangaligo sa south. O ang taga Carcar mismo nga magdali sa pagpalit.
Kon adunay mopalit, pugson nila nga mopalit bisan mamili pa. Pasuko-suko pa ang tindera kon dili modayon sa pagpalit. Ug kon mopalit gyud, tadtaron dayon, unya dalion sa pagputos. Diay to adunay gi-apil mga pan-os nga lechon nga wa mahalin kagahapon. Aw, kon taud-tauran nimo og kaon manimaho gyud kay pan-os naman. Maayo ila na lang untang paksiwon ug ibaligya isip paksiw.
Miulbo ang kaspa ni Mayor Mercy Apura sa dihang nakadawat ning mga reklamo. Iyang gipatawag ang mga namaligya og lechon sa merkado ug gipangasab-an. Aw, katilaw gyud. Mirisi. Kining binoang sa pipila ka mga mamaligyaay og lechon sa Carcar, sila ra mismo ang nagpatay sa ilang negosyo. Kinsa pa may mopalit kon daghan na ang mga nabiktima? Kon dili kini nila hunungon, mas maayo pang diha na lang ta sa Talisay City mopalit. Mas safe pa na diha. (bobbygnalzaro@gmail.com)