Super Suroy: Lakaw na ta sa Macau

EIFFEL TOWER IN MACAU: Dili ni ang City of  Love, Paris kay kini makita sa Parisian Macao nga adunay ilang version sa Eiffel Tower ug modan-ag panahon sa kagabhion. (Nick Olayao)
EIFFEL TOWER IN MACAU: Dili ni ang City of Love, Paris kay kini makita sa Parisian Macao nga adunay ilang version sa Eiffel Tower ug modan-ag panahon sa kagabhion. (Nick Olayao)

INGON sila, masuroy nimo ang tibuok Macau sud sa tunga sa adlaw. Basin sa una, madala og half-day og suroy,

Pero karon, DMD (minubo sa di ma da) kay daghan na ka og kaadtuan ug daghan na ang mga kalingawan.

Ingon sila, pulos ra casino ang naa sa Macau. Daghang casino sa Macau apan adunay laing kaadtuan o kasuroyan.

Sukad niadtong tuig 2008 hangtod na sa 2018, moabot sa 41 ka casinos ang nadugang sa Macau ug tanang dagkong hotel adunay casino.

Hotel adventure

Unya pwerte ra ba kadagko sa mga hotel sa Macau, wayuk (binali sa kuyaw) gyud.

Kanang Waterfront Cebu City Hotel sa Lahug, Cebu City, kanapuon na sa The Venetian Macao.

Sigun pa sa among guide nga usa ka adlaw ang imong igahin kung imong adtuon ang tanang andana ug suok sa The Venetian.

Kada hotel, adunay show sa lobby matag 15 o 30 minutos ug tungod sa kadaghang casino hotel, nagkadaiya ang mga ilang salida ug pakulo aron pagdani sa mga tawo ug customer.

Ginadili ang pagpiktyur-piktyur sulod sa casino apan sa ubang bahin sa hotel, okey ra nga manguryoso ka ug mag-unli selfie ilabi na nga daghang nindot kaposingan. Wa ug tuo ang Instagrammable moments.

Samtang ang Wynn Palace adunay dancing fountain sa gawas nga bahin ug ug dragon show sa sulod.

Aron makaabot ka sa Wynn Palace, mosakay ka og cable car ug libre ra ang sakay.

Sa Studio City, laing wayuk nga hotel diin mahimo nimong masuwayan sa pagsakay sa Golden Reel Ferris Wheel ug makita nimo ang panoramic view sa bag-ong reclamation development sa Macau.

Take note dili ni libre kay mobayad ka og P675 matag tawo ang mosakay sa ferris wheel.

Sa Galaxy Hotel, diamond show pud ang ilang gipasigarbo; dinhi ka makakita og usa ka higanteng glittering chandelier nga magsaka-kanaog dunganan sa pag usab-usab sa iyang kolor.

Bisan kaning lobby shows sa mga hotel nalang ang imong himuong “purpose for visiting Macau,” kay malingaw na ka ilabi na nga libre ra ang lobby shows unya mahimo ra ka mosakay sa hotel buses aron moadto sa laing hote. Adunay rota ang hotel buses nga gisubay.

Tourist spots

Kung di pud nimo trip ang pagsuroy-suroy sa casino hotels, mamahimong motipas ka ngadto sa Ruins of St. Paul ug Senado Square, kining duha ka most popular tourist spots ug madala og suroy sud sa tunga sa adlaw.

Nahimutang sa Senado Square ang shopping district. Didto imong masud-ong ang naglaray nga mga tindahan sa brands nga kaya ra sa atong bulsa, samtang kadtong mga high-end o luxury brands tua nahimutang ug nagpundok sulod sa casino hotels.

Daghang Pinoy sa Macau ilabi na sa service industry—sama sa mga waitress, bartender, dealer sa casino, hotel staff apan mas daghan gyud hinuon ang Insik.

Ang Macau sakop sa China apan Special Administrative Region (SAR), nagpasabot nga aduna kiniy kaugalingon nga mga balaod, pang-gobiyerno ug currency o kwarta.

Dili kinahanglanon ang visa sa mga Pinoy nga mobisita sa Macau basta lang di molapas og 30 ka adlaw ang pag-istar.

Nindot tan-awon ang Macau panahon sa kagabhion tungod sa mga casino hotels nga way problema sa kuryente. Siga tanan!

Unsaon pag-adto

Aduna nay direct flights nga manukad sa Cebu to Macau vice versa. Ang Cebu Pacific adunay biyahe matag adlawng Lunes, Miyerkules, Biyernes ug Dominggo.

Gabii ang flights so pwede ra pang-weekend trip ug di ra ka ma-absent sa trabaho o eskuwela.

Ang regular fare sa Cebu Pacific sa Cebu-Macau anaa ra sa P2,356-P3,206. Mas makabarato ka kon promo.

Busa unsa pay inyong gipaabot? Lakaw na ta sa Macau.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph