GIBUTYAG ni Lapu-Lapu City Mayor Junard Chan nga way problema sa biyahe paingon sa isla sa Olango gikan sa mainland sa Dakbayan.
Kini bisan kon nakuhaan ang mobiyahe nga motorbanca paingon sa isla gikan sa Angasil ug Hilton wharf gumikan sa pagpatuman sa Maritime Industry Authority (Marina 7) sa ilang modernization program sa mga motorbanca.
Ubos sa naasoyng programa, wa nay tugotang kahoy nga motorbanca nga makabiyahe sa kadagatan.
Matod ni Chan nga niadto ra nga Nobyembre 1 adunay gamay nga kalangay nga nasinati ang mga pasahero paingon sa isla gumikan sa kadaghang pasahero nga buot manguli alang sa Kalag-Kalag.
Apan karon balik na sa normal ang sitwasyon sa mga pantalan sa dakbayan.
Matod ni Chan nga iyang gihangyo ang Philippine Coast Guard niadtong Nobiyembre 1 ug 2 sa pagpalarga na lang sa ubang motorbanca basta kompleto lang sa kahimanan sama sa life jacket. Kon ugaling adunay mga pasahero nga matanggong sa mga pantalan sa dakbayan isip tubag sa suliran sa pagkakuwang sa makabiyaheng motorbanca.
Apan alang lang usab kadto sa okasyon sanglit sayod siya sa pagpatuman sa Marina 7 sa ilang modernization program. Karon kinahanglan nga mosunod ang mga operator sa lagda sa Marina 7.
Wa kadawat si Chan og reklamo nga nagpataas sa ilang pletihan ang mga nahabiling motorbanca nga gitugotang makabiyahe.
“I don’t know sa mga owner sa pumpboat kon mohangyo ba sila sa Marina-7 to renew their travel permit,” matod ni Chan.
Si Atty. Daniel Martin Oral, legal officer sa Marina-7, nibutyag nga wa nay laing motorbanca nga magbiyahian sa mainland Lapu-Lapu ug isla sa Olango ang mo-expire ang permit karong tuiga.
Alang niya, kaigo ra usab ang nahabiling pito ka mga motorbanca nga magbiyahean sa naasoyng rota sa pagkakaron kon dili lang panahon sa holiday season.
Sa pito ka motorbanca nga magbiyahean sa pagkakaron, upat niini ang nagpabiling kahoy, duha ang fastcrast ug usa ang fiber glass.
Aduna untay 10 ka mga motorbanca nga magbiyahean sa naasoyng rota, wa pay labot niini ang fastcraft.
P50 ang pleti sa fastcraft samtang P20 ang ordinaryong motorbanca.
Pasabot ni Oral nga sa ngadto ngadto mailisan ra ang nagpabiling kahoy nga motorbanca apan, di lang sa pagkakaron aron usab dili maapektohan ang mga sumasakay.
“Amo lang gi-invite ang mga pasahero nga mo-file og verified complaint with supporting documents sa ilang na-observe sa fluctuation sa rate then we will take action. Naay may corresponding fines and penalties and sanctions ana,” tubag ni Oral sa pangutana kon wa ba nagpalabi sa ilang pleti ang nahabiling motorbanca nga gitugotang makabiyahe.