MIKOLETA og 400 kilos nga mga basura ang mga kawani sa Solid Earth Development Corp. (SEDC) ug sa mga supplier niini gikan sa dakong sapa ug kabaybayonan duol sa pantalan nga gipadagan niini sa San Fernando.
Gipahigayon sa SEDC ang pagpanglimpyo ni’ng bag-o pa ang uban sa primerong kliyente niini, ang Taiheiyo Cement Philippines, Inc. (TCPI), ubos sa Adopt-an-Estero Program sa Environment Management Bureau.
Gisugdan ang dokumentadong pakig-alayon pagka-Agusto 14, 2018 nga molungtad pa hangtud Agusto 14, 2020, matod ni Mitzie Almira I. Carin, tagduma sa SEDC alang sa human resources and administration division. Uban sa mga kawani sa FA Manpower Corp., Triple 8 Resources Development Corp., ug San Fernando Integrated Services & Equipment Corp., gilangkoban nila ang hapit 600 metros nga agianan sa tubig ug baybayon.
Miapil ang mga kawani sa SGT Logistica Y Recurso, Inc. sa kalihukan subay sa sapang Luknay ditdo sa Barangay South Poblacion asa nahimutang ang pantalan sa SEDC ug planta sa semento sa TCPI.
Mikolekta ang 40 nga misalmot og 50 na mga sako sa linabay, kasagaran plastik, nga gitago una sa materials recovery facility sa SEDC nga sa pagka-uga gipakaon ngadto sa orna sa TCPI isip alternatibong pangsugnod.
Samtang, sa pagdapit sa Mining and Geosciences Bureau, katulo mipadala’g delegasyon ang SEDC ning tuiga sa paglimpyo sa sapa sa Bulacao sa Cebu City, ilabina na tungod sa taytayan sa Candulawan.
Miabag ang SEDC sa maong paningkamot ubos sa programang Recognizing Institutions towards Vibrant amd Enhanced Rivers (RIVERS) for Life sa Department of Environment and Natural Resources.
Komitido ang SEDC sa padayong pag-ugmad sa Environmental Management System niini nga taudtaud nang gisagop ug gitamod pinaagi, taliwa sa uban, pag-abag sa mga programa sama n’ng mga bag-ohay pa nabuhat. (PR)