NAMATAY ang usa ka gituohang durugista nga subject sa buy-bust operation sa Gun-ob Police Station sa Lapu-Lapu City Police Office LCPO pasado alas 5, Miyerkules sa hapon, Nobiyembre 6, 2019.
Kini human giingong nisukol sa kapulisan atol sa gipahigayong operasyon sud sa pinuy-anan sa subject.
Ang napatay sa kapulisan giilang si Rolando Allaba Jumao-as, alyas Negro, taga Purok Rambo, Barangay Babag, Dakbayan sa Lapu-Lapu.
Matod ni Police Major Wayne Magbanua, hepe sa Gun-ob Police Station, nga nakamatikod si Jumao-as nga pulis ang iyang katransaksyon diha sa pultahan sa pinuy-anan.
Giingong iyang gitukmod ang pulis nga nagpaka-aron ingnong poseur buyer.
Human matukmod ang pulis, nihana kini og kuha sa armas sa iyang hawak hinungdan nga napugos ang mga backup nga pulis sa pagpusil kang Jumao-as, kinsa namatay diha-diha.
Human maigo, wa mosulod dayon ang kapulisan sa balay samtang ila pang giklaro kon duna bay laing tawo sa sud.
Nagbuy-od na nga patay si Jumao-as dihang ilang gisulod sa balay tungod sa mga samad pinusilan.
Mikagar
“Nakabunot gyud siya og armas. Ang problema wala mobuto ang iyang first, pero nakabuto gyud siya iyang armas tapos nakabantay man siya. Iya pa ganing gilamba akong pulis kay dunay gitakin armas sa likod mao gitulak niya. Maayo na lang wa maigo so nakabawos ta. Naigo gyud siya,” matod ni Magbanua.
Si Jumao-as gihulagway nga high value target sa Gun-ob Police Station nga tigpayuhot og ginadiling drugas sa Brgy Babag ug lungsod sa Cordova.
Nakuhaan si Jumao-as og moabot sa dos gramos nga ginadiling drugas nga mokantidad og P13,600 ug usa ka revolve.
Kilo nga shabu
Wa magtuo ang duha ka mga drug pusher nga pulis diay ang ilang kasabot tungod kay mga bag-ong nawong ang gigamit nga poseur buyer sa San Nicolas Police Station sa Cebu City Police Office (CCPO).
Ang mga suspek giilang sila si Renante Henarque Villarin, alyas “Nante”,18, ug Joel Anguay 26, pulos taga dan Tupaz, Block 1,Barangay Sawang Calero, Siyudad sa Sugbo.
Niuban sa buy-bust sa San Nicolas Police mao ang Police Drug Enforcement Group (PDEG) Visayas Special Operations Unit-5, pinangulohan ni Police Major Kenneth Paul Albotra, hepe sa San Nicolas Police
Nasakmit ang usa ka kilo sa gituohang shabu gikan kang Villarin. Mobalor og P9 milyones ang balor sa mga bulto nga shabu nga nasakmit sa mga pulis. (GCM, BBT, AYB)