GIDILI na ni Mayor Mercidita Apura ang paggawas sa stall ug pag-atang sa mga kustomer sa mga mamaligyaay og lechon sa Carcar City Public Market.
Kini iyang gimando human sa nag-viral nga post sa Facebook mahitungod sa pagpamugos sa mga kustomer nga mopalit sa ilang baligya.
Mapugos sila sa pagtuman kay dunay gimontar nga close circuit television (TTCV) camera.
Kon dunay masakpang molapas, tangtangon sila sa pwesto.
Managlahi usab ang mga reaksyon sa mga mamaligyaay.
Si Vilma, 13 na katuig nga mamaligyaay og lechon sa Carcar City Public Market, niingon nga di tinuod nga sila namugos ug dunay gisagol nga bahaw sa ilang baligya.
Wa usab naapektohan ang ilang halin tungod niini.
“Dili man to tinuod gud. Pero karon nahitabo naman to ron. Halin man gihapon mi, wala man mi naapekto gawas lang atong naay ASF, nihunong gyud among halin.” saysay niya.
Adunay uban nga wa nihatag sa ilang reaksyon apan, niingon nga wa kaayo nihinay ang ilang halin.
“Naa gyud kalahian. Kusog gihapon maski naa patong ASF, ari gihapon mamalit ang tawo. Nihinay sya pero di gyud ingon nga hinay. Dili na pareho sa una,” matod ni Rutchel Largo, kinsa siyam na katuig nga mamaligyaay og lechon sa siyudad.
Anaa say mga mamaligyaay nga nagdumili og hatag sa ilang mga ngalan apan, niingon nga dugay na nila nga kabalaka ang pagpamugos ug pag-ali sa mga kustomer.
Nisaysay sila nga alihan sa mga mamaligyaay ang mga kustomer aron di makalahos og pamili sa lain.
Dungag pa nila nga kini ila nang gipaabot sa una sa mayora ug giistoryaan ang mga mamaligyaay apan igo rang naminaw sa kadiyot, sa di madugay, mobalik ra kini sa maong bulahaton. Niangkon usab sila nga nihinay ang ilang halin tungod sa isyu.
Si Mayor Apura niingon nga anaa na silay giamdam silot sa mga mamaligyaay nga ing-ana ang klase sa pagmaligya.
Ang tag-iya sa nahisgotang stall nga gitumbok sa Facebook post nagdumili og hatag sa iyang habig.