APROBADO na sa konseho ang gidusong sugyot ni Konsehal Zaldy Ocon niadtong Lunes, Nobyembre 4, nga tukoron ang monumento ni kanhi former senate president ug usa ka Kagay-anon nga si Aquilino “Nene” Pimentel Jr.

Sa gipadangat nga special report ni Ocon, giingong kini usa ka pamaagi sa Kagay-anon nga pasidunggan ang nahimo niini ug legasiya lakip na sa mga natabang sa siyudad ug sa tibuok nasud.

“He has contributed of course to the development of our very own city of course the city of Cagayan de Oro, I understand that during his incumbency as mayor of Cagayan de Oro he’s the one urged the transfer of the old cemetery located at Hayes street to Barangay Camaman-an particular na sa Bolonsori tungod sa iyang gihimo nga initiative nabulahan ang siyudad,” matud ni Ocon.

Gidugang pa niini nga sa pagbalhin sa maong sementeryo daghan nga mga buhatan ang natukod sama sa Hall of Justice, Commission on Higher Education (CHED), Cagayan de Oro Police Office headquarters, Barangay Hall, ug uban pa.

Naaprobahan na ang maong resolusiyon diin nag-awhag sa Historical Commission nga konsiderahon ang maong sugyot ug istudyohan ilabi na ang pagtukod sa maong monumento dili lamang kay Pimentel apan lakip na sa mga namatay na nga mga kanhi mayor sa siyudad sama nila ni Pablo Magtajas ug uban pa.