TUNGOD sa giingong nasinatiang sunod-sunod nga linog ang rason nga nahugno ang covered court sa Punta, Barangay Bonbon nga proyekto sa Kongresman sa unang distrito sa dakbayan sa Cagayan de Oro.
Nasayran nga tulo ang samaran nga mga trabahante, kinsa nailang sila si Arjel Gallana, 22, Ronnie Miñoza, 26, ug Wilson Berja, 27.
Sa pahayag sa tinugyanan sa Department of Public Works and Highways (DPWH)-Northern Mindanao giingong kini tungod sa sunod sunod nga nasinatiang pagtay-og.
“Successive occurrence of earthquake has eventually affected the stability of the project. During the strong tremors, part of the tack welded structure were raptured which already weakened the structure,” sa gipagawas nga pahayag sa DPWH.
Gidugang pa nga ang kontraktor sa maong proyekto ang maoy motapos sa nahisgutang proyekto nga dili na mogasto pa ang gobyerno lakip na ang pagpatambal sa mga samarang trabahante.
Una na nga naghangyo sa katawhan si Kongresman Rolando Klarex Uy sa pagsabot ug niingong ipatiwas ang proyekto nga walay gasto ang gobyerno.
Ang proyekto anaa na sa 80 porsyento sa dihang kini nahugno.