Molupyo tiilan sa Mt. Apo gipabakwit na

NORTH COTABATO -- Nagpagawas og ultimatum nga mando si Kidapawan City Mayor Joseph Evangelista sa mga molupyo sa tiilan sa Mt. Apo nga mohikling gilayon.

Kini gumikan kay dunay mga bungtod nga nangliki ug nidahili sa mga sitios nga Sayaban ug Agco sa Barangay Ilomavis, Kidapawan City.

Mga bakwit sa evacuation site nga naa sa tiilan sa bulkan gibalhin dayon sa mas luwas nga dapit sa Barangay Ilomavis.

Matud ni Evangelista kinsa nangulo sa Kidapawan City Disaster Risk Reduction and Management Council nga delikado na kaayo nga mahugno ang dakong bukid sa tiilan sa bulkan ug ig-on ang namuyo sa maong mga sitios sa barangay.

Kini pagpangandam tungod sa matag karon unya nasinati gihapon ang aftershocks sa linog, lakip na ang kusog nga ulan sa nagkulismaot nga lakat sa panahon.

Giklaro nga kadtong magmagahi sa pagbakwit sa maong mga sitios, kinahanglan nga mopirma og waiver nga dili manubag ang lokal nga kagamhanan sa Kidapawan City kon ugaling dunay dautan nga mahitabo kanila.

Daghan nga molupyo sa maong barangay gibati og kahingawa sa ilang negusyo, uma, mga kahayupan ug mga balay nga ilang biyaan. (Edgar E. Fuerzas)