NIDANGOP sa manambalan ang inahan aron nga ipasusi ang anak nga lalaki nga 12-anyos nga giingong wala madala og ayo sa doktor sa dihang gibati niini ang pagsakit sa tiyan niadtong Nobyembre 4, 2019.
Nagpatago sa pangalang Delfin ang biktima nga usa ka Grade 6 pupil sa Cateel, Davao Oriental nga suma pa sa inahan nga si Belenda, mag-lima na ka adlaw nga nagsakit ang tiyan ug magpunay og suka-suka nga daw babayeng buntis nga nangala.
“Natingala man lang ko pagkagabii niadtong petsa 3 (Nobyembre) gisakitan man siya sa tiyan. Abi nako og gipanuhot lang mao nga akong gihaplasan iyang tiyan apan pagkabuntag nagpunay man og digwa-digwa nga daw babayeng nangala mao nga akong gikomedyahan og pangutana nga, ‘buntis ka, Dong?’,” saysay sa inahan nga maoy kauban sa bata nga nidangop sa manambalan.
Sumala pa nga niadtong Nobyembre 4, gidala sa doktor ang biktima apan wala maayo ug padayong gisakitan sa tiyan ug kanunay nga magsuka-suka hinungdan nga wa kini maka-eskuwela hangtud nga adunay silingan nila nga nakasulti nga ipatan-aw og manambalan kay basin og gidautan.
“Naa may nagsulti namo nga diri mi magpatambal mao nga mibiyahe mi gikan Cateel paingon diri’s New Bataan (Compostela Valley Province) aron nga mapatambalan ning akong anak,” dugang saysay sa inahan.
Apan ang manambalan nga taga Barangay Poblacion, New Bataan nga mihiling sa biktima alas 12 sa udto niadtong Miyerkules nag-ingon nga gikalag siya kay ang pagkaong gihalad sa lubnganan sulod sa sementeryo atol sa adlaw sa mga minatay iyang gisungkab.
Nasayran nga niadtong adlaw sa kalag-kalag, ang biktima, kauban sa iyang mga paryente namaligya og kandila ug sa samang higayon manglimpyo sa mga pantiyon sulod sa sementeryo aron nga makakuwarta.
“Adtong kalag-kalag didto mi mibakasyon sa lungsod sa Monkayo kay didto man ang among mga paryente ug akong mga igsuon. Ug kay lagi duol sa menteryo ang balay sa akong maguwang, miuban ni akong anak pagpamaligya og kandila sulod sa menteryo,” dugang batbat ni Belenda.
Niangkon ang biktima nga nanghilabot siya sa pagkaon nga gibutang ibabaw sa pantiyon ug iyang gikaon bisan pa man sa pagbadlong sa iyang ig-agaw sanglit nakita niya nga ang ubang mga bata nga susama nila nga nagsuroy-suroy sa menteryo nangaon sab sa mga pagkaon nga nahibilin ibabaw sa mga pantiyon hinungdan nga niadtong Nobyembre 3, nagsugod na og sakit ug nagsuka-suka ang biktima.
Human mahiling, gitambagan ang mag-inahan sa manambalan nga mohalad og pagkaon ngadto sa pantiyon diin nanguha og pagkaon ang biktima isip bugti sa pagkaon nga gikaon sa bata.