KINSE ka bag-ong traffic enforcers ang gi-hire sa City of Talisay Traffic Operations Development Authority (CT-Toda) kinsa mopuli sa mga "ligoy" nga enforcers sa dakbayan.
Bag-o gi-hire ang mga bag-ong enforcer, gipaubos sila sa pasulit ug pipila ka bahin sa interview. Apan una pa nga hingpit nga mahimong traffic enforcers, ipaubos sila sa duha ka adlaw nga training ug ipaubos sa usa ka test.
Giangkon ni Jonathan Tumulak, pangulo sa CT-Toda, gituyo kini aron pagtisok sa ilang panumduman nga gihaguan nila ang pagsulod sa maong trabaho ug angay nga ilang kining tagaan og bili ug importansya.
Mahinumdoman nga 15 ka traffic enforcers ang gitangtang sa serbisyo tungod ang uban kanila nagpositibo sa gipahigayon nga drug test kaniadtong Hulyo ug nakadawat ang buhatan og daghang reklamo, susama sa kanunay nga wala sa assigned post ug pangilkil.
“Kini sila atong ipuli sa pipila ka mga traffic enforcer nga ato unang gipapahuway sa ilang mga serbisyo tungod sa daghang mga rason. Usa na niana ang dili kaayo matinud-anon sa serbisyo, enforcers nga aduna'y mireklamo. During investigation na-proven nato nga naa'y problema,” pasabot ni Tumulak.
Dungan sa mopaubos sa training sa mga bag-ong traffic enforcer ang mga barangay tanod nga plano nang i-deputize sa CT-Toda.
Matod ni Tumulak nga matag barangay ang nitagana og lima ka tanod nga ma-deputize sa CT-Toda diin mamahimo na sila nga moisyu og citation sa mga malapason sa trapiko, ilabi na sa sudlunon nga dapit sa ilang matag barangay.
“Mao na siya'y nakab-ot nga kasabutan tali sa barangay ug sa local government unit tungod kay nakita man gud nato nga sagad sa mga problema sa traffic naa gyud mismo sa ilang mga barangay. So kon pananglitan dili dayon namu maatiman, dunay mga enforcers nga gikan anang barangay maoy una dayon mohatag og aksyon, uban na sa mga tanod,” dugang ni Tumulak. (FMD)