Talento: Panic-ky

MAAYONG adlaw, higala. Kumusta ang atong pagpanikay-sikay dinha?

Ubay-ubay sa akong mga kahigalaan ang aduna pa gihapoy kahadlok sa mga ning labay’ng mga pagtay-og pinaagi sa makusog nga linog sa atong isla.

Gani, katong nagtrabaho sa taas nga building sulod sa pila ka tuig, nag-resign, YES, ning undang na og pagpanarbaho tungod sa trauma hatod sa linog.

Kung atong nabantayan, morag nagkadaghan ug nagkakusog ang mga katalagman sa kasamtangan. Kuwarenta anyos pa ko mao wala kaayo nasayod kung mas makahadlok ang mga natural nga disaster sa unang mga panahon kumpara karon.

Tungod dili kaayo kusog ang linog sa akong dapit, wala ko ningbatig kahadlok bisan napukaw ko sa akong pagkatulog. Ningbangon ug nag-ampo ra ko nga walay kakuliang mahitabo sa pamilya, higala ug kaila nako.

Tuod man, okay ra kaayo mi tungod sa proteksyon ug pag amping sa Ginoo, migo. Kaniadto, tulo ka andana sa balay ang gihandum nakong tukuron aron kung dunay baha, safe akong pamilya ug kabtangan. Apan karon, TUNGOD SA LINOG, morag ang pagpuyo sa taas nga balay, makahadlok.

Usahay sa kinabuhi no kay morag wala tay kabutangan kay bisan unsa atong pilion nga desisyon dili garantisado nga walay problemang mosugat nato.

Nganong ninglinog? Ingon sa taga Maynila nga tampalasan, tungod kuno kay dautan ang atong pangulo. Sa taas nga edukasyon nga ilang nahiaguman, ang ilang gawi mas daut pa sa mga dili graduhan.

Ang uban nagkanayon nga tungod nagkadaut ang moralidad sa katawhan ug nagpakatagbaw sa sala ang kadaghanan mao silot kini sa Kalangitan.

Sa pagkatinuod, ang Ginoo sa langit (dili tong taga Buhangin) ra ang nasayod sa tinuod nga rason. Matod pa sa Bibliya, dili matungkad ang kaalam sa Diyos mao dili ni kayang sabton sa mga mortal sama nato, igsuon.

Dili na lang kita magbinasulay o magnilabayay og dili maayong istorya kay DILI man gayud kini ang kasolbaran sa atong mga problema.

Gamiton na lamang nato ang atong kusog ug kaalam sa pagdiskubre sa katuyoan sa Ginoo, ug pagtabang sa mga isig-kaingon nato. Dili man kita moginansya og mga salapi apan makahimaya kini sa Diyos bisan wala pa kita’y madawat nga ganti dinhi sa yuta karon, mare.

Sa tanang natong maagian sa life; dili ta mag-panic o ma-praning. Magmalisto kita ubanan sa mga pag-ampo aron makapadayon kita sa pagpanginabuhi ug pagkinabuhi dinhi sa kalibotan, AMEN?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph