IGACOS, Davao del Norte -- Padayong gitambalan sa ospital ang lalaki nga gipusil human makiglalis sa kapitan sulod sa barangay hall sa Limao sa Samal District alas 9:40 sa buntag, Miyerkules, Nobyembre 6.
Ang biktima giila nga si Jovanie Bolano Enriquez, 55, minyo, molupyo sa nahisgutang dapit.
Sa report nga nakuha gikan sa Davao del Norte Provincial Police Office, nasayran nga ang biktima gipusil ni Kapitan Teody Bankil Batoon, Sr., 55, taga Purok 1B sa maong barangay.
Gidali pagdala ang biktima sa Davao del Norte Hospital Samal Zone apan wa madugay gibalhin ngadto sa Southern Philippine Medical Center.
Samtang ang suspek boluntaryong mitahan sa iyang kaugalingon sa Igacos Police Station bitbit ang armas nga .38 Armscor Revolver nga adunay serial number 771277, uban sa lima ka mga buhing bala.
Base sa imbestigasyon, nasayran nga ang biktima ug ang suspek nagkalalis sulod sa barangay hall nga maoy hinungdan sa pagkuha sa suspek sa iyang armas sulod sa opisina ug gipusil ang biktima sa makausa ka higayon tumong sa likod nga bahin sa lawas.
Temporaryong gikustodya sa Igacos PNP ang kapitan samtang gipaabot ang pormal nga reklamo sa biktima. (Dexter T. Visitacion)