SHARIFF AGUAK, Maguindanao Province -- Duha ka high-value target nga drug dealer ang nadakpan sa mga awtoridad alas 12:25 sa udto niadtong Huwebes, Nobyembre 7.
Nailhan ang mga suspek nga sila Samrod Damada alyas Sam ug Nordin Datala.
Sumala kang Philippine Drug Enforcement Agency regional director Juvenal Azurin nga nagpahigayon sila og anti-drug operation sa national highway sa Barangay Poblacion 2 sa lungsod, uban ang Maguindanao police, lakip na ang mga sakop sa 1st Mechanized Infantry Brigade, Philippine Army.
Sa diha nga gitunol na sa mga suspek ang gidiling druga sa tiktik sa PDEA, gipangdakop dayon sila.
Narekober sa posisyon sa duha ka drug dealer sulod sa dala nila nga plastic sando bag ang usa ka kilo nga gituohang shabu nga nagkantidad og P6.8 milyon ug marked money.
Gawas sa druga, nakuha sab nila sulod sa gisakyan sa mga suspek ang usa ka M16 A1 Colt AR-15 ug mga bala.
Gikanayon ni Azurin nga dugay na nilang gipanid-an ang mga suspek nga nalambigit sa large scale illegal drug trade sa Maguindanao ug Cotabato City.
Priso na ang duha sa selda sa PDEA sa Cotabato City ug gipasakaan og kasong kalapasan sa Republic Act 9165 o Comprehensive Dangerous Drugs Act of 2002, lakip na illegal possession of firearms. (Edgar E. Fuerzas)