DEAD on the spot ang usa ka babaye ug ang anak niini nga 11-anyos human gitigbas sa kapuyo gumikan sa selos niadtong Miyerkules didto sa Brgy. Megcauwayan, Calinan District Davao City.
Nailhan ang suspek nga si Renuel Wabinga Habillo, alyas Lotlot, 32-anyos, mag-uuma ug residente sa Purok New Waterfalls, Barangay Megcauwayan samtang ang biktima mao si Evelyn Saganay Lapera, 40-anyos, ug ang anak niini nga si Joy Saganay Lapera, Grade 6 student.
Sa inisyal nga imbestigasyon sa Homicide and Arson Section sa Calinan Police Station, giingong nasipok ang hunahuna sa suspek nga kapuyo sa babaye dihang iyang nasayran nga dunay kabit ang biktima.
Dihang nag-away sila, walay duha-duha nga mikuha og sundang ang suspek ug kalit gitigbas ang kapuyo sa makadaghang higayon.
Nangatanggal pa ang buhok sa biktima gihang giayo niini og tigbas ang ulo, liog bukton ug ang dughan.
Atol sa insidente, nakita kini sa 11-anyos nga anak sa biktima hinungdan nga misiyagit kini, apan sa kalagot sa suspek giduol niya kini ug gitigbas sab sa nagkadaiyang bahin sa lawas.
Patay diha dayon ang mga biktima samtang boluntaryo nga mitahan sa kaugalingon ang suspek sa opisyal sa barangay sa maong dapit.
Dugang nasayran nga wala na suma pa’y gusto ang biktima ngadto sa suspek gumikan sa kalain niini og batasan labi na og mahubog.
Giingong nakahukom ang biktima nga magbulag na sila apan dili madawat sa suspek ang maong hitabo butang nga iya kining gipatay.
Ang patay nga lawas sa mag-inahan gihaya na karon sa ilang pamilya samtang ang suspek gibalhog sa selda sa Calinan PNP kinsa pasakaan og duha ka ihap sa kasong pagpatay didto sa korte.