BUNGOL ang mga dunggan sa hustisya
Kay wa makabati sa inagulo ug daghong
Sa pamilyang gibiyaan sa mga biktima
Sa tokhang ug extra-jdicial killing.
Ang halap niyang mga mata gitabonan
Pa gyud og itom nga panapton.
Misamot hinoon ang iyang pagka buta
Wa na siya makakita sa pagdagmal
Ug pagdaugdaog sa mga kabos nga huyang
Sa abusadong mga kamot sa nagpatuman
Sa balaod sa demokratiko kunong
Kagamhanan.
Bungol ang mga dunggan sa hustisya
Kay gilakip na pagtaptap sa itom nga panapton
Nga nagtabon sa iyang mga mata.
Wa nay bili ang gigunitang timbangan
Kay ang kahaw-ang sa kaangayan da man
Ang iyang gitimbang