NAKIG-ABOT kang Erwin sa Green Meadow Mall ang magtiayong Roger ug Alma. Dunay sampol nga ‘herbal supplement’ si Erwin nga ihatag sa magtiayon. Balor og P1,500 ang sampol, apan wa lang unay bayad kay sampol man.
Klasmeyt sa kursong Accountancy sila si Roger ug Erwin. Puro na CPA karon. Apan si Erwin hilig og negusyo. Duna siyay ‘financier’ nga higala. Nag-imbento silag ‘herbal medicine.’
Nahaylo si Roger nga gi-estoryahan ni Erwin sa ka-epektibo sa iyang tambal. Ginganlan kini niyag ‘The Cure.’ Matod ni Erwin, daghang mga himatyon na nga grabe og mga sakit nga nangaayo sa The Cure.
Si Roger ug si Alma dunay dayabitis. Si Alma, gawas sa dayabitis, may sakit sa kasingkasing. Hapit kada tuig na-ospital, labi nag mosuol ang ‘palpitation’ sa iyang kasingkasing. Si Roger, gawas sa dayabitis, may artraytis. Gusto silang duha nga hingpit nga mangaayo.
Paniudto ang ilang sabot. Anha sila mangaon sa Native Queen. Si Roger ang mobayad sa ilang paniudto. Nagsigeg teks si Erwin nga hapit na siya moabot. Apan tataw nga daghan siyang gipanghapitan. Alas dose dihang nanulod sila si Roger ug Alma sa kan-anan. Nag-una na lang silag pangaon.
Ala una na dihang miabot si Erwin. Gitilawan dayon nilang Roger ug Alma ang ‘herbal supplement’ samtang naniudto si Erwin. Mitumar silag tagsa ka kutsara sa likido nga kape ang bulok. Sweet-and-sour ang lami.
Pagka taudtaod naglain dayon ang lawas ni Alma. Mibutok-butok ang iyang dughan. Padung na siya sul-an sa ‘palpitation.’ Mitumar dayon siya sa iyang gi-mentin nga tambal. Gi-resita sa doktor para lang sa higayon nga mohana pagsuol ang iyang sakit sa kasingkasing.
Sa laing bahin, naglain ang tiyan ni Roger. Midagan siya ngadto sa kasilyas.
Paghibalik niya giuli dayon nila ang sampol ngadto kang Erwin. Way tingog-tingog si Erwin nga mibiya.
Mi-desisyon sila si Roger ug Alma nga agwantahon na lang nila ang ilang gi-mentin nga mga tambal. Kaganina, dugayng nakagawas si Roger sa pansayan kay nagsigeg sirit ang iyang lubot.
Miabot og tulo ka adlaw una motang-on ang kalibanga ni Roger. Nakamatngon sila si Alma nga kon may tawo nga naayo sa usa ka tambal, wa kini magpasabot nga makaayo sab nila ang maong tambal. Nakahukom sila nga dili magpasagad og tumar, kay dili gyud magkapareho ang epekto sa tambal sa lain-laing tawo. Kuyaw pod kon ang tawo alerdyik sa maong tambal. (Katapusan)