ANG pulong nga recycle nabaniog sa diha nga gihingusgan sa gobyerno ang pagpatuman sa balaod sa segration. Ang paglain sa basura nga malata og di malata.
Kasagaran sa mga basura nga di malata adto motugpa sa mga junk shop kay pwede pa masapian.
Apan di lang basura ang ma-recycle. Atong kaugalingong kusina naay mga niluto nga mahimong i-recycle. Gikinahanglan lang nga lutoon og usab. Depende hinuon sa klase sa pagkaon. Pananglit ang subra nga piniritong isda, isubak sa utan. O ba kaha isubak sa tinuno-an nga mongos. Ang subrang adobong baboy o manok isagul sa pansit.
Kining gipanghisgutan nato nga subra kong ibalik ra sab nato og plastar sa lamisa labi na kong maugmaan, wa na gyuy lami.
Samot na kong ibaligya. Bisan unsa nga panindang sud-an nga naugmaan na, wa na gyuy ayo. Bisan initon pa. Gawas lang siguro sa inun-onan kay pulong pa sa uban magka dugay magka lami. Kong maghisgut ta og barbecue nga manok o baboy, labaw na ni nga way lami kong ang wala mahurot og kaon karong adlawa initon pagka ugma.
Samot na kong ibaligya. Way kalainan sa gi-recycle. Nahisgutan nako ning recycle nga pagkaon tungod sa isyu sa lechon sa Carcar City karong bag-o. Nagbaha sa social media ang mga negatibong komento labot niadtong gi-post nga reklamo sa usa ka customer.
Ang reklamo labot ning pinugsanay pagpapalit nga usa ka matang sa pagpang harass. Ambot nganong karon pa naalarma ang city hall. Unta to gibadlong na ni sila kaniadto pa ug gotudlo-an unsa ang mga maayong gawi ang sagopon pagtratar og mga customer.
Nang gawas na hinuon ang mga baho nga naglakip niining pagbaligya og bahaw nga lechon nga gisagul sa bag-ong luto. May basihanan man o wala ang mga pasangil, dako kini og epekto sa negosyo sa lechon sa maong ciudad. Ang pait kay naapektuhan ang mga nagtinarong.
Ang pangutana, mabalik pa ba ang pagsalig sa publiko? Sa akong pagtoo sa hinay hinay mabalik ra kini apan kinahanglan una nga ipatuman ang lapad nga kausaban. Nahinumdum siguro mo sa nahitabo sa Larsian sa Fuente Osmeña kaniadto.
Isyu sab ning paagi sa mga tindera ug tindero pag-agni sa ilang mga kustomer. Apil na ang ang reklamo labot sa pagmaniubra sa bayranan. Human ipatuman ang seryosong kausaban nabalik ra sab ang kaalegri sa Larsian. Isip usa ka Carcaranon apil ko sa nasubo ug nauwaw ning hitaboa. Hinuon wa ko kawad-i sa paglaum nga matunhay ra ning tanan. Di lang lechon sa Carcar apil na ang ubang pagkaonan. Tukma nga customer service angay isilsil sa alimpatakan. Sipyat sa usa pagan ang tanan.