Editoryal: Naleksiyon na unta

Editorial Cartoon by John Gilbert Manantan
Editorial Cartoon by John Gilbert Manantan

HUMAN gi-meeting ni Carcar City Mayor Mercedita Apura ang mga tindera ug tindero og litson sa ilang siyudad tungod sa nag viral nga pagpangabuso ug panikas niini ngadto sa mga kustomer, naobserbahan na karon ang dakong kausaban sa sulod sa merkado.

Sa pagbisita sa mga media, pipila ka adlaw human nakontrobersiyal ang mga manindahay og inasal sa maong dapit, nawala na kadtong magsigi og babag ug mamugos ngadto sa mga kustomer.

Haruhay nang makapamili ang mamalitay og inasal nga dili na makasugat og kahasol. Wala nay mosita ug manghadlok kanila.

Gidid-an na usab ang mga lechoneros sa pag-gawas sa ilang tagsatagsa ka tarima aron mangunbensi sa mga kustomers.

Mipasalig ang mayor ngadto sa publiko nga hugot nilang monituron ang mga manindahay og inasal pinaagi sa mga security cameras nga ibutang sa palibot niini.

Ang masakpan nga padayon gihapon sa ilang mga binuang nga binuhatan, imbarguhan sa puwesto ug dili na kini patindahon pa sulod sa merkado.

Usa sa mga tindera’g lechon ang miangkon nga nga naapektohan ang ilang halin human mikatap sa social media ang alegasyon sa ilang pagpanikas ngadto sa mga kustomer.

Daghan usab ang nangreklamo kalabot sa tikas sa timbangan ug lipatlipat sa mga tindero nga mailisan og bahaw nga lechon ang ilang gipalit.

Sa positibo nga bahin, angay ikalipay sa mga hingtungdan nga mga lechoneros ang nahitabo kay kon magpadayon pa kadto, moabot ang panahon nga wala nay mamalit pa kanila.

Higayon na karon nga ilang ipakita ang kausaban, aron mobalik ang pagsalig sa mga kustomer ngadto kanila.

Ang nahitabo, nahitabo na, ug hinaot nga mao kini maghatag kanila og dakong leksiyon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph