USA ang nagpositibo sa paggamit ug ginadiling drugas sa mga kawani sa Clean and Green ug City Environment Natural Resources Cenro nga gipaubos sa kinalit nga drug test niadtong Hwebes sa City of Lapu-Lapu Substance Abused and Prevention C-Losap.
Mao kini ang gikompirmar ni Lapu-Lapu City Mayor Junard “Ahong” Chan sa iyang press conference uban ang mga sakop sa tigbalita sa iyang buhatan.
Gibutyag ni Chan nga ang maong empleyado ubos sa Clean and Green ug usa ka lalake.
Pagkataktak sa trabaho gihapon ang naghuwat sa naasoyng empleyado nga nagpositibo human masubay ang insaktong proseso.
Posible usab nga ipaubos siya sa rehabilitasyon kung mosugot kini aron matagaan siya ug kahigayonan nga makabalik trabaho sa city hall.
“Subject for confirmatory pero kung mapatud-an gyud siya nga nag-positibo sa ginadiling drugas o shabu automatically terminated siya,” matod ni Chan.
Kagahapong adlawa Biyernes gipaubos na usab sa kinalit nga drug test ang moabot sa 94 ka mga sakop sa General Service Office (GSO), IT department ug Public Information Office (PIO).
Ang maong mga buahtan mao nay katapusang mga departamento sa dakbayan nga gipaubos sa drug test sukad sa paglingkod ni Chan isip mayor sa dakbayan.
Matod ni Garry Lao, pangulo sa C-Losap, nga gawas sa naasoyng mga kawani nipaubos usab ug drug test ang 4 ka mga staff sa Homecare Center nga absent human gipaubos usab sa drug test ang naasoyng buhatan niadtong Miyerkules.
Aduna usay mga kawani sa Cenro ug Clean and Green nga nipaubos ug drug test human usab nangabsent sa ilang schedule sa miaging adlaw.
“Mao na ni ang last nga office nga wa pa nato ma-drugtest," matod ni Lao. (GCM)