GITUNOL na ni Mandaue City Mayor Jonas Cortes ang P8 milyunes ngadto sa nagkadaiyang lider sa Cotabato sa Mindanao nga grabeng naapektuhan sa linog.
Samtang karong Lunes, Nobiyembre 11, gikatakda nga ihatag usab sa probinsya sa Sugbo ang P20 milyunes nga ayuda ngadto sa Mindanao nga dad-on ni Bise Gobernador Hilario Davide III.
Kauban ni Mayor Cortes ang iyang mga konsehal nga silang Andreo Icalina ug Jun Arcilla.
Ang hinabang gikan sa Mandaue gidawat na ni Vice Governor Emmylou Taliño-Mendoza sa Cotabato ang tseke aron iapud-apod ang sa nagkadaiyang munisipalidad nga napilian sa gobyerno sa Mandaue nga hatagan og tabang pinansyal.
Human nga mibista si Cortes sa Kpitolyo, midiretso kini sa dakabyan sanKidapawan ug gitunol ang chiki nga P2 milyunes nga tabang pinansyal ngadto kang Mayor Joseph Evangelista.
Nakadawat ang lungsod sa Makilala P2 milyunes, tagsa ka milyon alang sa lungsod sa Tulunan, Magpet ug M’lang samtang P500,000 ang nadawat sa lungsod President Roxas ug tag P250,000 sab alang sa lungsod sa Matalam ug Kabacan.
Samtang, gipahinumdoman karon sa Provincial Social Welfare and Development Office (PSWDO) nga bantayan ang expiry dates sa mga de lata ug tubig nga i-donate alang sa mga nabiktima sa linog sa Mindanao aron mapuslan pa kini.
Niadtong Sabado, Nobyembre 2, 2019 gipahibaw sa kapitolyo nga modawat kini ug donasyon alang sa mga biktima sa Mindanao.
Sulod sa unang lima ka adlaw sa pagdawat sa mga donasyon may moabot sa 1,500 na ka mga binotelyang tubig ang nadawat sa PSWDO nga usa sa giingon labing kinahanglan karon sa mga biktima.
Lakip sa mga nadawat nga donasyon karon sa probinsya mao ang mga de lata, noodles, mga sinina, ug hygiene kits.
Apan sa gibutyag nga gidaghanon sa hinabang nga tubig nasayran nga di mo menos 800 niini, ma-expire na karong buwana samtang 700 niini maoy ipada sa Mindanao.
Hinuon, gibutyag ni Johnel Espinosa, staffsa PSWDO nga ang mga bottled water nga ma expire na karong buwana ipanghatag sa mga bag-o lang nasunogan.
“Mostly is atong kailangan jud ang canned goods ug tubig nga parehas aning 350ml nga pwede nato mahatag dayon didto diretso, pero request lang sad namo nga dili lang sad kanang hapit na ma expire kay aron mada gyud didto, mahatag nato kay wa man gud ta mahibaw kanus-a i-ship,” matod ni Espinosa.
Gawas sa mga de lata ug tubig may P3, 250 nga hinabang nga nadawat ang probinsya alang sa mga biktima.
Usa sa gikinahanglan karon sa mga biktima mao ang mga trapal o tents nga mahimo niining mapasilongan samtang dili pa sila makabalik sa ilang mga panimay. (KFD, ANV)