SUPERBALITA CEBU

Mga presyo sa ham misaka; supply igo ra: mga negusyante

UPAT: Tungod sa ban sa pork or pork related nga mga produkto, upat ra ka suppliers sa ham ang makabaligya sa merkado sa Sugbo. (Alex Badayos)

TUNGOD sa padayon nga pag-ban sa mga karneng baboy ug pork related products sa Sugbo subay na usab sa Executive Order 23 ni Cebu Gov. Gwendolyn Garcia, limitado sa upat ka brand ang ham nga mapalit sa mga Sugbuanon.

Samtang sa labing uwahi nga suggested retail price (SRP) sa noche buena items sa Department of Trade and Industry, anaa sa 10-12% ang pagsaka sa pipila ka produkto sa ham karong tuiga itandi sa presyo niini niadtong 2018.

Matod sa senior trade and industry development specialist sa DTI 7, Dinah Gladys Oro, ang ham products sa Virgina, Sunpride, Kings ug Belcris available nga mapalit sa publiko..

Sagad sa ham products sa Virginia nisaka og P20 ngadto sa P41 o 10-12%.

Ang Virginia Brick Ham (500g) gikan sa P169 niadtong 2018 anaa na sa P189 karong tuiga; Virginia Pear Shaped Ham (500g) nga anaa sa P169 sa 2018 karon anaa na sa P189.

Anaa usab sa P29 ang pagsaka sa Virginia Pear Shaped Ham (800g) gikan sa P230 nga presyo niini sa 2018, anaa na sa P259 ang presyo niini karong 2019; susama usab ang gisaka sa Virginia Pear Shaped Ham (1kg) gikan sa P270 sa 2018, anaa na sa P299 karong 2019.

Niabot sa P41 ang pagsaka sa Virginia Jamon de Bola (1kg) gikan sa P329 sa 2018 anaa na kini sa P370 karong 2019.

Samtang P39 ang gisaka sa Virginia Seasons Delight nga ham gikan sa P370 sa 2018 ug karon naa na sa P409.

Sa SRP sa DTI, ang Virginia lang ang giluwatan og price difference alang sa 2018 ug 2019.

Samtang gawas sa ham, misaka sab ang presyo sa fruit cocktail og .55% ngadto na sa 3%.

Sa ubang noche buena items, wala ray paglihok sa presyo o gamay ra.

Ang mga sandwich spread, elbow and salad macaroni, spaghetti sauce ug mayonnaise wa kaayo’y paglihok sa presyo.

Adunay usa ka brand sa keso de bola nga mikunhod ang presyo og 5.24% ug 3.39% samtang nikunhod usab ang presyo sa tomato sauce.

Nag-monitor

Dugang ni Oro nga kon adunay masakpan nga namaligya og noche buena items nga lapas sa SRP, ang ilang buhatan mo-isyu og letter of inquiry sa di pa mopagawas og show cause order diin kinahanglan nila mohatag og rason nganong namaligya sila og lapas sa SRP.

Gisugdan na nila ang price monitoring sa habagatan ug amihanang dapit sa Sugbo.

Samtang sugod sa Lunes, Nobiyembre 11, mas pahugtan ang ilang price monitoring lukop Central Visayas hangtod sa Disyembre.

Awhag ni Oro sa mga manindahay nga motuman sa SRP ug sa mga consumer kon sa ilang tan-aw mahal ang baligya katungod nila nga mopalit og laing brand nga mas barato

Ang maong SRP gipagawas sa DTI niadtong Oktubre 31, 2019.

Naapektuhan

Ang Virginia Foods, usa sa lokal nga pork brands sa Sugbo, niingon nga ang industriya naapektuhan sa African Swine Fever (ASF).

Si Stanley Go, bise presidente sa sales and marketing sa Virginia Foods, niingon nga ilang gisuportahan ang gobernador kinsa nilugway sa ban hangtod sa June 2020.

“Let us help each other as meat processors and at the same time hog raisers so that we can overcome these challenging times,” siya niingon.

Matod ni Go nga dunay sayop nga pagtuo ang mga konsumidor labot sa virus bisan mga baboy lang ang naapektuhan niini.

Si John King, managing director sa King’s Quality Foods Inc., tag-iya sa King’s Quality Food, nipasalig sa SunStar Cebu nga duna silay igong supply alang sa Pasko. Matod niya nga ang ilang processed nga karne luwas kan-on.

“We would ensure that the prices and supply are stable while assuring the general public our processed meat is safe for consumption. Obviously, if the cost of raw materials whether imported or locally sourced is constantly increasing for all processors, we can slowly adjust the prices according to the market leaders. In addition, we have enough supply for the Christmas season to cater to the growing demands in Cebu and the Visayas region since we have procured our meat supply before the ASF outbreak,” matod ni Go sa usa ka pamahayag.

Samtang si Faye Delima, marketing supervisor sa Belcris Food Inc., niingon nga ilang giumentuhan ang ilang presyo bisan wa pa ang ASF. (dugang taho ni JOB)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph