GIPASIRADO ni Carcar City Mayor Mercedita Apura niadtong Biyernes sa hapon, Nobiyembre 8, 2019, ang upat ka mga stall sa mga lechon human masuta nga aduna kiniy nabuhat nga mga kalapasan.
Ang gipasirado nga mga stall mao ang Mercy Roel’s, Honeylette Navaja’s, Arlene Manreal’s ug Loreta Camanero’s Lechon
Nag-isyu si Apura og Executive Order no. 055 ubos sa Memorandum Circular # NICE- 110419-031 diiin giimbestigar ang nagkalain-lain nga mga reklamo batok sa mga mamaligyaay ug pagpasirado sa mga stall.
Ang pagsirado gimando human ni-viral ang usa ka Facebook post mahitungod sa pagpamugos sa mga kustomer nga mopalit sa ilang baligya.
Ang imbestigasyon gipangulohan sa market supervisor ug city legal office. Ilang nasayran nga ang mga stall dunay mga kalapasan sama sa way mayor’s permit ug sanitary permit ug pagamit sa limbungan nga timbangan.
Lakip sa mga kalapasan mao ang paggawas sa ilang stall ug pag-ali sa sales attendants sa agianan ug pagbaligya og mga salin nga lechon.
Si Apura, sa phone interview, niingon nga wa na siya maghuwat nga maabtan pa sunod semana ang pagsulbad sa problema mao nga personal siyang niadto sa merkado.
“Ganiha, ako na silang giingnan nga pasensya na mo. Aron pag-save sa uban namaligya og lechon kinahanglan isakripisyo ta mo. Di man sad mo magbasol nako kay daghan man sad mog violation,” matod ni Apura sa Superbalita Cebu. (JCT)