SUPERBALITA CEBU

Pulis nga ‘killer’ gi-manhunt

AKTIBONG pulis sa probinsya sa Negros Oriental gitumbok nga gunman sa pag-ambush patay sa usa ka radio blocktimer sa Siyudad sa Dumaguete niadtong Huwebes sa buntag, Nobiyembre 7, 2019, human masikop ang iyang duha ka mga driver.

Gilusad gilayon ang manhunt operation batok kang P/Cpl. Roger Rubio apan, sa pagsuwat ning taho, wa pa siya madakpi.

Nasikop sa mga sakop sa Negros Oriental Police Provincial Office (Noppo) pasado alas 5 Huwebes sa hapon ang duha ka mga driver sa pag-ambush patay kang Dindo Generoso sa Barangay Piapi.

Si Generoso padung sa usa ka sibyaanan alang sa iyang programa dihang gipusil sa riding in tandem.

Ang mga nasikop giila nga silang Teddy Reyes, 44, taga Barangay Batinguel ug P/Cpl. Glenn Corsame, taga San Jose Village, Barangay Banilad, Siyudad sa Dumaguete.

Matod ni Noppo Director Police Colonel Julian Entoma nga nailhan nila ang driver sa dihang nasubay nila pinaagi sa kuha sa close circuit television (CCTV) camera kinsa ang tag-iya sa sakyanan nga giluwanan sa gun man.

Human pusila si Generoso, nisibat ang duha ug sa usa ka dapit, nibalhin ang gunman sa usa ka four-wheeled nga sakyanan.

“Sa atong mga CCTV footage, na indentify nato ang kining sakyanan una nga gigikanan sa triggerman. Kining Mitsubishi. Then continuous ni ang atong pag follow up until such time nga atong nabaw-an ang tag-iya. Then ang nagdala aning sakyanan then hangtod nga nakuha nato ning driver and at the same time iyang gitudlo ning maoy nag-drive aning Rubio, kining si Glenn Corsame, “matod ni Entoma.

Wa moklaro si Entoma kon unsa nga matang Mitsubishi nga sakyanan.

Si Reyes ang driver sa mao nga sakyanan samtang si Corsame driver sa motorsiklo nga giangkasan sa gunman.

Human masikop si Reyes, nitug-an siya nga ang nipusil sa komentarista usa ka pulis nga sakop sa Provincial Mobile Force Company sa Negros Oriental nga giila nga si Rubio.

Dugang ni Entoma nga gi-surrender na usab ni Corsame ang iyang cellular phone.

Didto ilang nasuta nga nagtaksanay sila ni Rubio nianang kaadlawon sa wa pa patya si Generoso.

“Apil ni sa plano kay atong makita sa ilang mga conversation nga sayo pa sa kaadlawon, nag-communicate na sila sa police nato nga triggerman nga magpasugat. Then mao na pa spottan ang subject nila,” dugang ni Entoma.

Human sa impormasyon, nagpahigayon sila og manhunt operation sa suspek.

Ila na usab nga giadto ang balay ni Rubio sa siyudad sa Guihulngan apan, wa kini mopauli sukad sa miaging adlaw.

Ila usab kining giawhag nga mo-report sa iyang mga labaw o mo-surrender sa buhatan ni Entoma aron tubagon ang pagtumbok nga siya ang nipusil patay sa radio blocktimer.

“Manhunt siya namo ron. Tuloy tuloy ang pagpangita sa iyaha. Naa koy directive sa iyaha nga pakoanon sa iyang superior, pareporton or diri sa akoa as provincial director para to shed light aning koan ron insidente nnga siyay naging suspek aning pataya ni Dindo,” matod ni Entoma.

Lakip sa awhag ni Entoma kang Rubio nga di na motago pa sanglit siya ang gitudlo sa iyang mga kauban ug maklaro usab sa CCTV video ang iyang hulagway.

Wa pa nila masayri unsay motibo sa pulis nganong iyang gipatay ang komentarista.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph