MISAAD si Nonito “Filipino Flash” Donaire sa iyang duha ka mga anak nga iyang dad-on ang prestihiyusong Muhammad Ali trophy human sa ilang away ni Japanaese “Monster” Naoya Inoue niadtong Huwebes sa Japan.
Apan lahi ang dagan sa panghitabo human sa 12 ka rounds nga binukbokay.
Napilde si Donaire pinaagi sa unanimous decision ug naangkon ni Inoue ang Muhammad Ali trophy nga maoy tipik sa ganti sa final bout sa World Boxing Super Series sa Saitama Super Arena sa Saitama, Japan.
Sa iyang kagustohan nga tumanon ang iyang saad, mihangyo si Donaire kang Inoue nga huwaman una niya og usa ka gabii ang Muhammad Ali trophy aron ipakita kini sa iyang mga anak.
Si Donaire nag-post og video sa iyang Facebook account aron ipakita nga misugot si Inoue sa iyang hangyo.
“I came to Japan to take the Muhammad Ali trophy. I promised my sons they would see it in the morning,” matod ni Donaire nga napatik sa www.gmanews.tv.
“And with tears in my eyes, I humbly asked Inoue to borrow it for a night, not for me but for my [world.]”
Gusto ni Donaire nga sa iyang mga kasinatian, adunay makat-unan ang iyang mga anak sama na lang ning maong kapakyasan nga iyang gisagubang.
“It’ll pain them to see my face. They’ll kiss my wounds. They’ll see a trophy we don’t get to take home and understand what it means to want to train harder,” pasabot ni Donaire.
Gipasalig ni Donaire nga buhaton niya ang tanan aron makabanwi siya ning maong kapakyasan sa ugma damlag. (ESL)