SUNODSUNOD nga mga derby sulod sa buwan sa Nobiyembre ang nakahan-ay na sa New Gallera de Mandaue sa barangay Tabok, dakbayan sa Mandaue.
Si Wading Monsanto, ang pit manager sa maong Gallera, ang mipagawas sa tanan nilang mga kalihukan karong buwana pinaagi sa social media.
Sugod niadtong Nobiyembre 7, gipahigayon ang laing hut-ong sa 3 Stag Elims sa Bakbakan ug nianang sunod adlaw natigayon usab ang unang 2-stag/cock elims round sa Sinulog 2020 derby nga may ganting P11 million.
Mikabat ngadto sa 150 ka entries ang kompirmado ug tungod gipahibawo ni Monsanto nga sugdan ang unang sultada sa ala una sa hapon.
Karong adlawa, Nobiyembre 9, ang Gemini Star mopahigayon og 5 Stag derby nga may P500,000 nga premyo samtang P11,000 ang pot money.
Sa Dominggo, Nob. 10, laing 4 Stag na usab ang masaksihan ubos sa UGBGA Promotions.
Aduna pa'y laing 10 ka mga derby ang nakaandam na karong buwana. (JBM)