DUWA karon
5:00 pm- San Miguel batok Rain or Shine
Seguradong luna sa top four maoy tinguha sa San Miguel Beermen sa ilang pagpakigbatok sa Rain or Shine Elasto Painters sa nag-inusarang duwa karong hapon sa Philippine Basketball Association (PBA) Governor’s Cup sa Hoops Dome sa Lapu-Lapu City.
Ang Beermen kasamtangang nagpatong sa ikaupat dala ang 6-3 nga rekord apan puwede pa silang mailugan ning maong puwesto hinungdan nga kinahanglan nilang modaog sa nahabilin nilang duha ka mga duwa sa elimination round gikan karon.
Ang top four makapanag-iya og twice-to-beat nga bintaha sa quarter-finals.
Bisan wala sila’y import, ang Beermen nakamaneho gihapon pagposte og overtime nga kadaugan batok sa Blackwater Elite, 99-96, niadtong Miyerkules.
Apan ning higayuna, naneguro na ang Beermen ug mikuha na kini’g bag-ong import nga si John Holland aron makapuli sa naanmgol nga si Dez Wells.
Sa ilang bahin, ang Elasto Painters nahimutang sa tagakunon nga kahimtang nga nagbitbit og 2-7 nga rekord.
Kinahanglang maharos pagdaog sa Elasto Painters ang katapusan nilang duha ka mga duwa aron posible pang makakumpayot pa sa ikawalo ug katapusang luna. (ESL)