SUPERBALITA CEBU

No. 1 spot ilugan

MGA duwa karon

12:00 pm- USJR batok CEC (High School)

1:30 pm- UC batok SHS-AdC (High School)

3:00 pm- USPF batok CITU (College)

4:30 pm- SWU batok UC (College)

6:00 pm- UV batok USJR (College)

Ilugan sa Southwestern University (SWU-Phinma) Cobras ug University of Cebu (UC) Webmasters ang No.1 nga luna sa college division sa ilang panagsangka sa ikatulong duwa karong hapon sa katapusang adlaw sa elimination round sa Cebu Schools Athletic Foundation Inc. (CESAFI) basketball event sa Cebu Coliseum.

Ang Cobras kasamtangang nag-una sa standing dala ang 9-2 nga rekord samtang sikit nga nagsunod ang Webmasters sa ikaduha nga adunay 8-3 nga baraha.

Ning sangkaa, mas taas ang poruhan sa Cobras nga maangkon ang No.1 nga luna kay duha ka mga agianan ang ilang puwedeng masubay paingon niini.

Una, kinahanglan lang modaog ang Cobras.

Kon mapilde man gani ang Cobras, makuha gihapon nila ang No.1 nga luna kon dili sila malubong og walo ka mga puntos.

Kini gumikan kay gipukan man sa Cobras og pito ka mga puntos ang Webmasters, 65-58, sa premiro nilang duwa.

Ang Cobras ug Webmasters parehong maggunit og twice-to-beat nga bintaha sa semi-finals isip ilang benepisyo sa pagkasulod sa top two.

Apan labing seguro, dili kuntento ang duha ka mga kampo niini ug pareho gyud nilang gusto nga maangkon ang No.1 aron makadugang sa ilang moral.

Ang mahimong No.1 team maoy makigbatok sa No.4 University of San Carlos (USC) Warriors samtang ang No.2 team maoy makigsangka sa three-time defending champions University of the Visayas (UV) Green Lancers nga maoy No.3 squad.

“We both want to win to get the number one spot,” matod ni Cobras coach Mike Reyes.

Sa high school division, ang Sacred Heart School-Ateneo de Cebu (SWS-AdC) Magis Eagles mosuway pagpugos og three-way tie sa ibabaw nga bahin sa ilang pagpakigbatok sa defending champions UC Baby Webmasters.

Ang Baby Webmasters maoy kasamtangang nag-una dala ang 8-1 nga rekord samtang naa sa ikatulong dapit ang Magis Eagles dala ang 7-2 nga baraha.

Maa sa ikaduhang dapit ang UV Baby Green Lancers nga adunay 8-2 nga rekord.

Kon modaog ang Magis Eagles karon, hayan makatabla sila sa Baby Webmasters ug Baby Green Lancers sa 8-2 nga baraha.

Ning maong senaryo, gamiton ang qoutient aron pag-ila sa top two teams.

Kon modaog ang Baby Webmasters, hayan maseguro nila ang No.1 unya makalibre’g sakay ang Baby Green Lancers alang sa No.2.

Sa laing duwa sa high school, magtagbo ang Cebu Eastern College (CEC) Dragons ug University of San Jose Recoletos (USJ-R) Baby Jaguars sa usa ka non-bearing nga kombati.

Ang Dragons ug Baby Jaguars nahilakip sa teams nga manamilit human ning elimination round. (ESL)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph