Saludo Kami: ‘Cacao Farmer Hero’

GIILANG pinaka-maayong cacao sa kalibutan ang cacao nga produkto ni Jose “Manong Joe” D. Saguban.

Si Manong Jose garbo sa Sitio Kialaw, Malabog, Paquibato District, dakbayan sa Davao.

Ang produkto ni Manong Jose nahilakip sa “Top 20 Best Cacao beans” sa world competition sa International Cocoa Awards sa Paris, France.

Ang Auro Chocolate, ang nag-unang produser sa fine chocolate sa nasud nagsulti, “we were ecstatic so we decided to bring him to Paris to receive his award in person, but wow! Little did we know he would make it to the Top 20 best cacao beans in the world.”

Agosto ning tuig, si Agriculture Secretary William Dar mihatag pasidungog ni Manong Joe isip Cacao Farmer Hero tungod siya ang nag-inusarang Pinoy nga mag-uuma nga nakasud karon nga tuig sa Top 50 entries alang International Cocoa Awards.

Atol sa Salon du Chocolat nga gihimo Oktubre 30 sa Paris, ang mapaubsanong mag-uuma mapasigarbuhong mibansiwag sa watawat sa Pilipinas, nahilakip sa Top 20 Award.

Ang kalampusan ni Manong Joe nagsilbing inspirasyon sa ubang gagmay’ng mag-uuma nga mas labaw pang maningkamot aron kinatibuk-ang matuhop ang internasyunal nga merkado.

“Just observe the recommended production and fermentation process and you can produce quality cacao beans,” ni Manong Joe. (PR)