DIGOS CITY -- Nagmuntar na ang lokal nga kagamhanan sa dakbayan og help desk alang sa emergency employment assistance niadtong mga nawad-an og trabaho human nahitabo ang tulo ka mga sunod-sunod nga linog.
Midagsa ang liboan ka indibiduwal aron magpalista sa help desk karong semanaha human nag-alayon ang local government unit ug Department of Labor and Employment (Dole) aron mahatagan og ayuda ang mga nawad-an og trabaho.
Gipahimutang sa City Special Programs and Management Office ang ilang buhatan sa Rizal Park ning dakbayan aron maoy mo-asikaso sa mga nangita og trabaho.
Matud ni Ailyn, 24, ug Rizalyn, 23, nga apil sila sa naapektuhan sa pagsirado sa Gaisano Grand Mall nga adunay dakong damyos.
Nagtrabaho ang duha isip sales lady ug promodiser sa mall, kinsa nagbutyag nga anaa pa sila sa trauma human nasinati ang pagtay-og sa dakbayan.
Gipailawom na sa rehablistasyon ang mall apan gi-abisohan ang ubang empleyado nga mobalhin lang una sa laing mga branch.
Apan alang kang Ailyn nga lisud kaniya ang pag-adto sa laing branch kay di niya mabiyaan ang iyang pamilya.
Ubang biktima, sama kang Genevieve nga cashier sa usa ka department store, nagpalista aron makakuha sab og assistance kay di na kini segurado kung makabalik pa sa trabaho ilabi na nga aduna siyay usa ka gamay’ng anak.
Gibutyag sa lokal nga kagamhanan nga di lang taga Digos ang tabangan nila kay apil ang mga taga laing dapit sa Davao del Sur apan nag-trabaho sa dakbayan.
Nasayran nga aduna nay 500 ka mga nalista sa first batch ug ipailawom kini sa cash for work.
Aduna silay madawat nga P369 matag adlaw human gidestino sa mga barangay alang sa relief distribution. (Orlando B. Dinoy)