MADAUM, Tagum City -- Napulo ka mga gituohang tigpayuhot og ilegal nga druga diin usa kanila menor de edad ang napuhag sa awtoridad atol sa “One Time Big Time” drug operation sa Tagum City Police Station-Drug Enforcement Unit alas 2 sa hapon niadtong Miyerkules, Nobyembre 6.
Sumala sa Tagum City PNP nga nakadawat sila og impormasyon gikan sa kasaligan nga impormante labot sa ilegal nga kalihukan sa napulo ka mga suspek.
Ang Tagum City PNP nag-ila sa mga dinakpan nga sila Abuhamsa Pandian Morena, 30; Elvin Zulite Altamarino, 30; Ricky Cerna Cabatingan, 45; JB Delima Barrientos, 24; Carmilito Meñosa Padernal, 35; Benje Arpon Morata, 22; Jun Jun Temo Morata, 19; Melvin Plantiosa Capalac, 29; Sallemar Dumile Baylon, 19; ug usa ka alyas Ken, 17-anyos.
Nakuha sa mga dinakpan ang siyam ka mga pakite sa gituohang shabu ug ang marked money nga P3,000 ingon mga mga drug paraphernalia nga maoy gihimong mga ebidensiya.
“Accordingly, these suspects have long been monitored by the Intel Operatives of the said unit peddling illegal drugs and lately we were able to locate their ‘hideout’ which led to this successful operation,” pahayag sa Police Regional Office (PRO) 11 pinaagi sa director B/Gen. Filmore Escobal.
Sa kasamtangan mga nahisgutan gipangbalhog na sa selda sa Tagum City PNP samtang giandam ang kaso nga ipasaka kanila didto sa korte. (Jeepy P. Compio)