PATAY na nga miabot sa ospital ang suspek sa pagpatay sa iyang kapuyo ug sa 11-anyos Sabado sa udto, Nobyembre 9, gumikan giingong namunlot og pusil aron pusilon unta ang mga pulis.
Kini ang gibutyag ni Police Captain Rosario Aguilar, officer-in-charge nga spokesperson sa Davao City Police Office (DCPO).
Sumala ni Aguilar nga gisulayan pa og dala sa ospital ang suspek nga si Renuel Wabinga Habillo, alyas Lotlot, apan gideklara na siyang patay dihang nahidangat.
“Gidala pa sa private hospital sa Calinan pero DOA (dead on arrival) na ang suspect,” ingon ni Captain Aguilar.
Giingon nga dihang ipahigayon na unta ang pag-finger print sa suspek, kalit niyang gibunlot ang pusil sa pulis, apan dali sab siya nga giniyutralisa sa operatiba.
Kahinumdoman nga gipanigbas sa suspek ang iyang kapuyo nga si Evelyn Saganay Lapera, 40-anyos, ug ang anak niini nga si Joy Saganay Lapera, Grade 6 student niadtong Miyerkules, Nobyembre 6, sa Barangay Megcauwayan, Calinan District, Davao City.
Sa inisyal nga imbestigasyon sa Homicide and Arson Section sa Calinan Police Station, giingong nasipok ang hunahuna sa suspek nga kapuyo sa babaye dihang iyang nasayran nga dunay kabit ang biktima.
Atol sa ilang lalis, gitigbas niya sa makadaghang higayon ang biktima ug giapil ang 11-anyos nga anak babaye nga miresulta sa ilang hinanaling kamatayon.
Sa pagkasikop sa suspek, iyang gisaysay nga hilabihan niyang sukoa human iyang nasayran nga dunay uyab si Evelyn.
Ning kasamtangan, patay nga lawas sa suspek anaa sa usa ka punerarya sa Calinan, dakbayan sa Davao.