KON ikaw nature lover, daghan og paagi aron makaadto ka sa usa ka dapit. Mahimong maglakaw o mag-hike. Kon duna kay motorsiklo labina pang off road, mas maayo. Mahimo usab nga magbiseklita ka. Mosikad ka sa mga bahin sa dan nga makaya nimo ang pagmaneubra, pagtungas o pagdulhog.
Sukad ko nisugod sa mountain biking, nakaadto ko sa kabukiran nga sa akong pagkabata akoa lang nadunggan.
Sa biseklita, mahimo rang magduot ka kon di makaya ug mosikad na sab kon makaya na. Ang advantage sa biseklita itandi sa motor mao ang iyang timbang. Kon mosuot ka unya di makaya, bisan gani sa motorsiklo, mahimo kang manaug ug moduot.
Kon motorsiklo ang imong sakyan, labinag tungason kaayo ug lisod ang pagmaneobra, nagkinahanglan ka og mga kauban sa pagduot. Unsa na kaha kon dangog kaayo ang dan? Usahay makamahay. Makamahay man gani usahay magtindak ka sa biseklita unya hapit na mag-abot ang suwang ug mga tuhod.
Apan lisod man tuod ang masinati, ang experience di baya kabayran. Kaanindot sa paminaw kon naa ka taliwa sa kakahuyan o naglantaw ka sa nagbawod nga kabukiran ug bugnaw ang huyuhoy sa hangin. Kana bang makawagtang sa stress sa kalangas sa siyudad ug ka busy sa trabaho.
Apan makaguol sab huna-hunaon nga daghan pa gihapon ang wa maka appreciate sa biseklita ug nahadlok pang mosuway.
NGANONG IMPORTANTE
Ang pagpasingot importante, labina sama nako nga naa na sa middle age. Sa stress, ang utok mogamay, matod sa mga pagtuon. Apan mahimo ning ma counter pinaagi sa pag-exercise physically ug mentally. Dinhi makita mo kon unsa ka importante sa ehersisyo sa pisikal ug mental nga aspeto.
Sa ako nang ginaingon, maanindot ang biseklita kay naka exercise ka na, nakasuroy ka pa. Unya mao usab ni ang bisyo nga kadaghanan sa mga asawa uyon ra. Ingon pa sa usa ka asawa nga nisulti nako:”maayo na lang na kay biseklita ang gikabungan, di babaye.”
Ang pagsuwat, pagduwa og chess ug pagbasa mga paagi sa pag-exercise sa utok. Busa, kon ubanan nimo ni og exercise, magpabilin kang hait.
OPEN SPACES
Sa bag-o pa kong nagtindak, daghan pa ang open spaces sa mga lugar sa siyudad sa Sugbo, sama sa IT Park ug Cebu Business Park. Apan sa paglabay sa pipila ka mga tuig, napuno na kini sa daghang mga building nga nanurok sama og uhong sa ting-uwan.
Naguol ko kay kining mga dapita paborito kaayo sa mga tig-exercise apan, karon di na madaganan kay daghan na og mga edipisyo.
Nakahuna-huna ko og balik niini human sa linog nga sunodsunod nga niigo sa Mindanao. Gikinahanglan ang open spaces alang sa mas luwas nga bakwitan sa katawhan. Nakahuna-huna bang kagamhanan?