WA na maglangay si Carcar City Mayor Mercedita Apura, iyang gipasirhan ang upat ka mga stall nga naninda og inasal sa merkado publiko sa siyudad human makaplagi sa ilang imbestigasyon nga nakalapas kini sa mga lagda. Maora ba og blessing in disguise ang nahitabong komprontase tali sa usa ka tag-iya sa stall ug mga kustomer, usa niini ni-post sa social media ug ni-viral.
Dugay na diay ning mao nga modus sa ubang mga maninda og lechon. Apan kon maot ang mamugos, mas grabe ang pagbutang og bahaw nga lechon sa bag-ong gipalit. Nitumaw kining mao nga modus tungod sa mga post. Mas laksot ni kay makadaut baya ang bahaw nga inasal sa lawas sa tawo nga makakaon. Posibleng masakit ug maospital ang makakaon.
Bisan gani pipila sa mga Sunstar journalist niingon nga sila mismo dunay mga kasinatian niini.
Sakto ang lakang ni Apura. Pasabot niya nga iya kining gihimo aron luwason ang industriya sa lechon baboy sa siyudad nga usa sa mga dapit sa Sugbo nga naila nga lamian ug barato gihapon ang mapalit.
Kinsa pa bay ganahan nga mopalit og inasal kon sa pagsulod pa lang nimo sa merkado, babagan ug pugson ka sa naninda. Ganahan ka ba usab nga mokaon sa inasal nga kaduha-duhaan kon bag-o o daan ba kini nga giinit lang?
Tinuod, makapatay kini sa sikat nga lechon sa Carcar City kon wa pa himoig lakang sa Siyudad. Nakadaut kini sa imahe sa Siyudad di lang dinhi sa Sugbo, apil na sa ubang mga dapit sa nasod ug abroad. Mao na ang gahom sa social media. Grabe ang impact.
Di lang kay karon lang unta kini ang paghigpit sa local government unit sa mga naninda og pagkaon sa Carcar. Hinaut pang makananunayon na kini tungod kay sa usa lang ka pamilok, maguba ang imahe sa dapit. Kay kon maayo ang pagdala sa mao nga industriya, dako ni og ikatabang sa ekonomiya sa siyudad ug madugang pa kini sa maayong imahe sa turismo sa dapit.