SUPERBALITA CEBU

Mongaya: Primero distrito angay tungaon

Panahom

ARON padayon ang paspas nga kalamboan sa unang distrito sa lalawigan sa Sugbo, angayan na kining tungaon ngadto sa duha ka distrito.

Alang kanako, kini ang angayang kabilin ni Kong. Eddie Gullas labi na karong nakabalik siya sa Kongreso.

Ang pagmugna og bag-ong distrito mahimong labing dakong kalamposan sa kongresista sa pipila niya ka dekada isip representante didto sa kaulohan ug political kingpin sa habagatang Metro Cebu.

Nakita nato nga paspas kaayo ang kalamboan sa habagatang bahin sa metro dihang nahimong syudad ang Talisay nga gisundan sa Naga ug Carcar.

Tungod niini, hinog na ang Syudad sa Talisay ug lungsod sa Minglanilla nga mahimong usa ka distrito.

Hinog na sab ang mga Syudad sa Naga ug Carcar uban sa lungsod sa San Fernando ug Sibonga nga mahimo usab nga usa ka bag-ong distrito.

Hinog na kining duha kon lantawon sa punto sa populasyon nga mas dako pa sa ikaduhang distrito dihang gitunga ngadto sa duha.

Mas labing hinog ang primero distrito kon lantawon nato sa punto sa economic development.

TALISAY

Karong ang batan-ong si Mayor Samsam Gullas na ang nagdala sa renda sa Syudad sa Talisay, mas ni paspas ang mga kausaban labi na sa naagian sa South Coastal Road.

Positibo kaayo ang mga feedback gikan sa akong mga nakaistorya nga taga Talisay kabahin sa mga proyekto diha sa Tabunok labi na sa merkado.

Ubos sa liderato sa atong suod nga higala nga si Joy Tumulak, nahapsay ang trapiko. Alang kanako, ang pagtudlo kang Tumulak usa ka inspired nga desisyon ni Mayor Gullas.

Makadasig sab ang pagbalik sa lechon festival ug ang direksyon sa mayor nga pagbuhi sa turismo diha sa Poblasyon.

Kagahapon sa buntag, misalmot na sab ang community youth football team sa Talisay ubos ni coach Escatron sa usa ka torneyo sa Don Bosco. Madasigon ang mga bata ug ilang mga ginikanan kay nagpaluyo na kanila karon si Mayor Gullas.

NAGA

Didto sa Syudad sa Naga, madasigong naglantaw si Mayor Val Chiong sa mga kalamboan diha sa kanhi Balili beach ug kining mga reclamation projects nga gisugdan sa pagtukod sa syudad.

Ato pang mahinumdoman dihang unang gipadayag ni Mayor Chiong sa unang charter day sa syudad kaniadtong Sept 5, 2007 ang iyang programa nga VAL 2020 kun Vision and Leadership 2020.

MGA RESERVIST

Wa makasabot ang mga army reservists nganong kulang na ang ilang ID aron makasulod dala ang ilang sakyanan. Kinahanglan na silang mopalit og sticker aron makasulod.

Sila nga nigahin og ilang oras, kwarta ug kahago aron makaserbisyo isip army reservist, pagastuhon pa gyud aron lang mosulod sa kampo.

(@anol_cebu sa Twitter)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph