DUHA ka menor de edad ug usa ka 25 anyos nga lalaki ang nasikop sa kapulisan sa gipahigayon nga buy-bust operation sa Sitio Sawsawan Barangay San Roque, Dakbayan sa Talisay, Biyernes sa gabii, Nobyembre 8, 2019.
Gihimo ang buy-bust aron madakpan ang subject sa ilang buy-bust nga usa ka high-value target apan kini nakaikyas.
Nasikop sa operatiba ang kauban niini nga si Clint McEnroe Cortel, 25, molupyo sa Barangay San Roque, kinsa anaa sa watchlist sa Talisay police, ug ang laing duha ka 17-anyos nga mga lalaki.
Matod ni Police Major Gerard Ace Pelare, hepe sa Talisay City Police Station, ang duha ka menor de edad nag-pot session.
Nakuha sa mga pulis ang mga pinakete sa shabu nga gibana-banang nagkantidad og dul-an sa P35,000.
Gipalawman pa sa kapulisan ang imbestigasyon batok sa ilang target usa sa tulo ka dinakpan.
Gipriso ang mga suspek sa Talisay City detention cell ug gikatakda nga pasakaan og kasong kalapasan sa RA 9165 o ang Comprehensive Dangerous Drugs Act of 2002 karong Lunes. (FMD)