Sukad niadtong Biyernes, Nobiyembre 8, 2019, gideklarar na sa Negros Oriental Police Provincial Office (NOPPO) nga absent without official leave (Awol) si Police Corporal Roger Rubio, gitumbok nga gunman sa pag ambush patay kang radio blocktimer Dindo Generoso niadtong Huwebes sa buntag, Nobiyembre 7.
Matod ni Police Colonel Julian Entoma, hepe sa NOPPO, nga sukad niadtong Huwebes wa na mo-report sa Provincial Mobile Force Company si Rubio.
Padayon nga nagtago-tago si Rubio samtang nagpahigayon sila sa ilang manhunt operation.
Nagtuo si Entoma nga naa sa mga kaila nagpundo si Rubio.
“Padayon namo nga gisubay ang mga amigo niya ug mga lungga niya. Gipadalhan nag memo sa CO niya (commanding officer) nga pa reporton, back to duty. Among gipangita, wala na siya makit-i, nagtago na gyud siya,” pasabot ni Entoma.
Ugma, Lunes, Nobiyembre 11, tangtangon na sa listahan sa Philippine National Police (PNP) si Rubio ug ipaputol na usab ang iyang sweldo.
“Awol na man siya sugod adtong Friday. Karong Monday amo na ipa cut off iyang salary aron dili na siya maka withdraw,” dugang ni Entoma.
Kasong murder ug administratiba ang atubangon ni Rubio.
Ang iyang duha ka mga kauban nga sila si Teddy Reyes, 44, ug Police Corporal Glenn Corsame nadakpan.
Ang giila karon sa kapulisan mao kon kinsa ang utok sa pagpatay kang Generoso, matod ni Regional Police Office (PRO) 7 Director Valeriano de Leon. AYB