SUPERBALITA CEBU

Sugilanon: Ang inahan sa akong textmate

LAMBERTO G. CEBALLOS

Cawayan, Dalaguete, Cebu

TEXTMATE mi ni Julie Ann ug Facebook friends pod. Disiutso iyang edad; ang akoa kay kuwarintay dos. Ulitawo kong guwang, apan wa ko motug-an kang Julie Ann niini. Ang akong gitug-an kaniya nga bayinte pa ko. Sa akong FB account ang profile photo nga akong gigamit mao ang litrato nako sa college pa ko. Way kalibutan si Julie Ann nga may teyksmet ug FB friend sab ko nga sama niyag bansagon, Gomez. Si Rowena Gomez trayentay otso anyos. Matahom sab si Rowena ug gitug-anan ko siya sa matuod kong personalidad. Ingon man, mitug-an pod siya nga siya biyuda nga may anak dalaga. Mag-chat mi si Rowena sa internet pinaagi sa ‘private message’ sa Messenger. Paglabay sa daghang mga adlaw nagkasuod mi ug nakahukom nga magkita sa personal. Giimbitar ko siya og ‘dinner’ usa ka gabii didto sa Ayala Terraces. Human sa among panihapon, nanan-aw mig sine. Dinhi gipadayag ko ang akong gibati.

“Wenna, ayaw kasuko, ha! Duna koy ipadayag nimo nga dugay na nakong gibati sud sa atong pagka FB friends ug textmate pod,” matod ko nga mikupot sa iyang kamot nga nabad-ay sa ‘arm’ sa sikit namong lingkuranan.

“Kon di na makadaot, wa koy angay ikasuko,” ni Rowena.

“To tell you the truth, I love you, Wenna! I love you so much!” hagawhaw nako nga hugot nga mikupot sa iyang palad.

Wala motingog si Rowena. Unya nabati ko nga gipisil-pisil niya ang akong palad dayon hugot nga gikuptan. “Dugay na sab nga na-in love ko nimo, Dave! I just waited for you to say it first!” hunghong ni Rowena nga mitutok kanako. Unya gihagkan niya ang akong ngabil.

Sakay sa awto nga akong serbis sa kompaniya nga akong gialagaran, gihatod ko si Rowena sa ilang balay. Paghiabot nako sa amo samtang naghigda ko mitunog ang akong selpon. Incoming message gikan ni Julie Ann.

“Dave, Ok na. Kita tas personal. Ingon ka U luv me. I luv u 2!” teks ni Julie Ann. Nahimut-okan ko. Misugot siya nga magkita mi sa personal. Mabisto na ko nga gurang na. Mibakon ko ug milingkod sa ngilit sa kama.

“Nus-a man?” tubag nga teks nako. “Ikaw decide. I wait!” ni Julie Ann.

Mihigda kog balik sa kama ug mitutok sa kisame. Unya mikilab sa akong hunahuna ang usa ka paagi nga makigkita kang Julie Ann. Dapiton kog dungan sila si Rowena ug Julie Ann. Basig paryente ni sila. “Kita ta ugma sa Lagoon Café sa Ayala. Lunch date. Okey?” giingnan ko si Julie Ann. Unya gitawgan pod nako si Rowena.

Pagka sunod adlaw sa Lagoon Café nianang pagka alas dose sa udto, naabtan namo si Julie Ann nga naglingkod sa ‘lobby.’ Nakurat siya dihang nakakita namo.

“Mommy?” ni Julie Ann. Dayon gitutokan ko niya nga nangunot ang agtang.

“Anak nimo si Julie Ann, Wenna?” sukna ko kang Rowena. Miyango si Rowena.

“Kinsa siya, Mommy? Why he knows me?” ni Julie Ann.

“Siya si Dave, akong FB friend,” ni Rowena nga kalit milingi nako. “Nganong kaila ka ni Julie Ann?” Gitug-anan ko siya sa matuod.

Samtang kami nangaon gisultian namo ni Rowena si Julie Ann sa among relasyon ug sa plano namo nga magpakasal sa labing dali nga panahon.

“Unsay ‘say’ mo, Anak?” ni Rowena nga mitutok kang Julie Ann.

Mitan-aw ang dalaga nako nga nagpahiyom.

“Okey ra ko, Mom! Maayo nuon, duna na koy bag-ong Daddy!” ni Julie Ann nga misenyas og ‘thumb up’ sama sa ‘Messenger’ sa Facebook. (KATAPUSAN)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph