ANG DMMA College of Southern Philippines (DCSP) miposte sa ikaduhang daug samtang ang John Paul II College of Davao (JPIICD) milangkat sa ikatulong kadaugan sa 2019 Collegiate Sponsors League (CSL) Escandor Cup sa Almendras Gym Davao City Recreation Center, Biyernes, Nobyembre 8, 2019.
Ang DCSP mipaunlod sa Mats College of Technology, 71-64, diin si BJ Flores mikamada og 16 puntos, upat ka steals, duha ka rebounds ug duha ka assists.
Siya nangamot og taman sa DCSP.
"Ang ako ra maningkamot ra jud ko unsay gisugo ni coach maoy akong buhaton," suma niya atol sa Escandor Cup Facebook video interview.
Ang DSCP milambo sa 2-2, win-loss card samtang ang DCSP mitiurok sa 2-2 sa bracket A sa Samahang Basketbol ng Pilipinas (SBP) 11-sanctioned league nga nagsilbing qualifying sa Philippine Collegiate Championships League (PCCL) Mindanao.
Samtang si Jessie Sabas, mibulsa og 25 ka puntos, 5 ka rebounds ug usa ka steal aron agakon ang JPIICD's 83-79 nga kadaugan kontra Holy Cross of Davao College (HCDC) Crusaders.
Si JPIICD coach Howard Delgado nagsulti nga ang depensa dakog tabang aron sila modaug.
"From the start sa ilang mind gusto dayon magscore pero sa fourth quarter ana ko nga defense lang ta kay muabot ra ang offense. Swerte kay sabay kay Sabas. Miracle na naka comeback mi. Depensa talaga nagbigay sa amin ng panalo."
Samtang si Sabas mitando sab niini, dungan sa pagsulting ang Crusaders kusog sa unang tulo ka periods.
"Ana si coach lingin ang bola, naa pay 10 minutes kaya pa muhabol."
Ang JPIICD kasamtangang may tulo ka daug.
Sa bracket B, Ranilo Aro-coached Holy Cross College of Sasa (HCCS) miangkon sa ikaupat nga kadaugan sa lima ka duwa human gipildi ang University of Mindanao (UM) PeƱaplata, 110-76.
Ang Brokenshire College, mipayukbo sa Rizal Memorial Colleges (RMC) Bulldogs, 84-59.
Ang laing duwa gihimo kagahapon, Dominggo, tali Brokenshire ug Aisat; HCDC vs San Pedro College; UM Main vs Mats College sa Almendras Gym.