ANG short film nga Home and Paradise sa Team Bang midaug nga Best Film ug naangkon ang laing tulo ka minor awards sa 1st Sine Mati Filmfest nga gipahigayon sa Mati, Davao Oriental.
Kini isip parte sa Sambuokan Festival 2019 sa nakalabay nga semana.
Ang film presentation ug awarding gipahigayon sa Mayor Francisco G. Rabat Mati Park and Baywalk, niadtong Oktubre 28.
Ang Home and Paradise mibitbit pauli sa P15,000 cash prize ug tropeyo. Nakuha sab nila ang Best sound, Best Cinematography and Best Editing.
Gitanghal isip second best film ang EST 2010 sa Tropang Kuletz nga midaug og P10,000 ug trophy.
Samtang, nalangkat sa Budyong sa Tribung Mati High ang ikatulong best film nga adunay P5,000 ug trophy.
Daghan sab ang mibilib sa akting ni Saniel Fumar sa Make up kit, maong nakuha niya ang Best Actor award.
Ang Best Actress sab gihatag kang Gilbeys Patalinghug sa El Paraiso ug Best Director si Haimara Lazaro.
Matag usa kanila midawat og 2,000 cash prize.
Ang SINE MATI Filmfest 2019 usa ka short film competition nga apil sa mga aktibidad sa Sambuokan Festival 2019.
Tumong sa aktibidad nga mapakita ang opinyon sa kabataan sa kasamtangang isyu lakip na ang
pagpromotar sa panaghiusa, kultura, turismo ug paglig-on sa kalambigitan sa kabataan diha sa dakbayan.
Ang SINE MATI 2019 gipaluyuhan sa City Tourism and Events, kapartner ang Local Youth Development Office sa City of Mati LGU. (CIO Mati)