DAKO ang pasalamat sa lokal nga kagamhanan ning dakbayan sa Digos ngadto sa nasud China human miabot na ang mga gitunol nga hinabang.
Mokabat sa 4,000 ka mga bags sa relief goods ang gitunol sa Chinese consulate sa dakbayan sa Davao ug mga sakop sa Filipino-Chinese Associations.
Ang matag relief packs, aduna’y sulod nga lima kilong bugas, hygiene kits, canned goods ug noodles.
Si Chinese Consul Li Lin nagbutyag nga kini ang ilang pamaagi sa pag-simpatiya sa mga biktima sa kusog nga linog.
Gibutyag sab ni Digos City Mayor Josef Cagas nga gawas sa mga food packs, misaad sab ang China nga mohatag og suporta alang sa rehilitasyon sa mga bagubang istruktura, water system ug ubang pang danyos sa linog.
Nipasalig sab ang Chinese consulate nga motunol og hinabang sa uban pang dapit sa Davao del Sur nga naapektuhan sa kalamidad.
Niadtong Sabado, miadto sab si Consul Li Lin sa lungsod sa Magsaysay aron itunol ang ilang tabang sa lokal nga gobyerno.
Sa miaging semana, gi-anunsyo sa China nga mohatag og donasyon nga mobalor sa P22-milyones sa Mindanao, human pipila ka kinabuhi ang naangol ug nakalas atol sa tulo ka kusog nga pagtay-og sa linog.