TUNGOD sa kabalaka nga aduna pa’y kusog nga linog, nanawagan ang ubang ginikanan sa lalawigan nga sa Enero 6 na magklase ang mga pampublikong tunghaan sa Davao del Sur.
Usa si Melissa Acaba, 45, nga mipirma sa gipahigayong survey nga sa buwan na sa Enero ang klase sanglit nabalaka siya sa iyang mga anak ilabi pa nga padayong nasinati ang mga aftershocks sa linog.
Apan, sa gipaguwang abiso sa DepEd-Davao, gimandoan niini ang mga school heads nga sugdan na ang klase karong buwana.
Gitahasan sab ang mga principal nga gamiton ang tanang pasilidad sa tunghaan lakip ang ilang mga buhatan aron didto ipahigayon ang klase.
Gawas niini, mangita sab ang mga opisyal sa tunghaan og mga Temporary Learning Spaces (TLS) aron makabalik na sa normal ang klase.
Sa tinguhang maluwas ang mga tinun-an, sa TLS una ipahigayon ang klase o kaha gamiton ang Alternative Delivery Mode Strategy kung diin hatagan og assignment, program ug project ang mga tinun-an didto sa ilang balay o sa luwas nga lugar ug ipasusi sa mga magtutudlo.
Samtang, sa Cor Jesu College (CJC) sa dakbayan sa Digos, nakakita na sila og luna nga butangan sa mga provisional classrooms sanglit di na magamit ang ubang lawak sa Senior High School ug Kolehiyo human miliki ang mga pader sa linog.
Nasayran nga wa maguba ang 30 ka mga classrooms sa basic education department apan sumala sa pamunuan sa tunghaan nga di kini paigo alang sa kapin 4,000 ka mga tinun-an.
Gumikan niini, girekomenda sa CJC nga sa Disyembre 2 na mobalik sa normal ang ilang klase mao nga sa buwan na sab sa Mayo motak-op ang ilang school year 2019-2020.