SUPERBALITA DAVAO

Sigbin ug barako, misiaw sa nalinogan

BANSALAN, Davao del Sur - Gawas sa mga pagtay-og sa aftershocks sa kusog nga linog, nakapaukay sab sa mga molupyo sa Sitio Bagong Silang, Barangay Managa ang giingong barako nga baboy ug sigbin.

Usa ka alyas Toto, 34-anyos, ang nibutyag nga nag-inusara lang siya sa ilang payag nga anaa sa pangpang nga parte sa lugar niadtong Lunes sa gabii, dihang kalit niya nga nadunggan ang tingog sa barako nga nag-ungad-ungad sa haligi sa balay.

Daling migawas ni Toto sa balay aron susihon ang palibot apan wa siya’y nakita nga bisan unsang hayop o kaha tawo sa lugar.

Matud niya nga iyang gisubay ang dapit nianang pagka-buntag apan wa sab nakita nga tunob sa baboy.

Human nanugilon si Toto sa ilang mga silingan, gitataw sab ni Ruben, 40-anyos, nga susamang kasinatian ang iyang namatikdan dihang natulog sab siya sa ilang umahan nga pipila lang ka metros ang gilay-on sa balay ni Toto.

“Bag-o ang kalag-kalag niadto ko sa ubos unya didto ko natulog kay para sayo ko makapatubig sa umahan, nakadungog sab ko og tingog sa barako," saysay ni Ruben.

Apan, ang mga dayo gikan sa Davao nga sila George ug Efren, nibutyag nga usa ka sigbin ang ilang nakita tungang gabii sa semana.

Ang duha midayo lang sa lugar aron magpanday og usa ka balay nga gihimong rest house sa ilang amo.

“Nigawas ko kay mangihi mga alas 12:00 na to sa gabii unya nakit-an nako naay dakong iro nga nagtuwad sa yuta mao to dali nako nga gitawag si Efren pero pagbalik namo nawala na, sigbin lagi gyud to,” tataw niini.

Pipila lang sila sa nagsulti nga aduna’y katingad-ang nilalang sa maong lugar.

Apan, matud sa molupyo nga si Andot, usa ka pahulayan kaniadto sa mga tawong magdayong og patay nga padung ilubong sa maong lugar.

“Sa una wa pa ma’y porlon unya og naay mamatay sa bukid, ginadayongan lang ang patay padung sa menteryo unya sagad dinha mopahulay ang magdayong,” asoy niini.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph