HUMAN sa kontrobersiya sa lechon sa Carcar City, atong gihagit ang mga tinugyanan sa panglawas sa matag local government unit (LGU) nga pahugtan pa og maayo ang ilang monitoring pagsiguro nga luwas ang pagkaon nga giladlad sa bisan asang suok sa ilang area of responsibility. Tungod sa kontrobersiya nasayran nga way sanitary permit ang pipila ka manindahay og lechon.
Kay way sanitary permit, natural lang wa say business permit nga mapakita. Isip kabahin sa proseso sa matag LGU ang tanan nga moabli og negosyo nasayod nang daan nga ang business permit nag-una nga panginahanglan. Basi sa kasinatian sa uban mahimong tinuyo ang di paglukat.
Posibli sab nga ang kapakyas sa paglukat nahitabo tungod kay gibinuangan sa tawo o mga tawo nga nagpasalig bugti sa salapi nga gibayad sa tag-iya sa negosyo. Di ni bag-o. Gani daghan na ang nagreklamo nga sila gipangwartahan sa kunohay suheto ug may koneksyon sa city hall o munisipyo.
Mao ni usa sa bantayanan. Di man ko motuo nga tanan nalang gyud nga nagnegosyo molihay sa ilang obligasyon sa gobyerno. Ang lain nga problema kon may tawo sa ahensiya sa gobyerno ang mopasalig nga siya na ang bahala bugti sa pipila ka pesos nga suborno. Naa pa ba ni ron?
May programa ba ang LGU niining gitawag nga internal cleansing batok sa ilang mga badlungon nga mga inspector ug ubang kawani nga gisangunan pagsiguro nga luwas kanunay ang gibaligya nga pagkaon? Sa giingon ko na dugay na kaayo ning problema sa lechonan sa Carcar.
Busa sa ubang LGU, ayaw huwata nga may mopabuhagay sa social media og kontrobersiya usa pa magkarakara og panira. Kana lang daang hairnet ug sneeze guard klaro kaayo na nga requirement pero daghan kang makita nga naninda og pagkaon nga kini gibaliwala.
***
Sa miaging semana, nakauban nako sa usa ka kapihanan sa gawas sa Camp Sergio Osmeña Sr. ang mga pulis nga nag-asikaso sa ilang promotion. Sa ato pa sa mosunod nga mga adlaw mosaka na sab ang ilang sohulan.
Ang nagranggo og patrolman mosaka ngadto sa pagka corporal, corporal ngadto sa pagka staff sergeant, staff sergeant ngadto sa pagka master sergeant, master sergeant ngadto sa pagka senior master sergeant, senior master sergeant ngadto sa pagka chief senior master sergeant ug chief senior master sergeant ngadto na sa pagka executive senior master sergeant. Mao ni ang ilang mga bag-ong ranggo gikan sa naandan nga PO1, PO2, PO3, SPO1, SPO2, SP03 ug SPO4. Kudos kaninyong tanan.
Tungod kay naggikan sa nagkadaiyang police station sa Central Visayas ang nag-abot didto aligre kaayo. Nahimo to nga instant reunion alang sa ubang classmate o batchmate nga sa dugay nang panahon wa na magkita. Daghan sab didto akong mga kaila ug kadungan dungan nako sa akong pagsud sa trabaho sa media.