IPAHUNONG ni Bise Presidente Leni Robredo ang pagpatay sa mga suspetsado sa ilegal nga drugas isip bag-ong lider sa kampanya sa gobyerno batok sa illegal nga drugas. Apan magpadayon ang kusganong paggukod sa mga nahilambigit niini.
Gipahayag kini ni Robredo niadtong Huwebes sa iyang pagdawat sa pagtudlo kaniya ni Presidente Rodrigo Roa Duterte isip co chair sa Inter-Agency Committee on Anti-Illegal Drugs (Icad). Si Robredo nahimong bag-ong drug czar sa Pilipinas.
Sa usa ka interview sa Reuters niadtong Oktubre 23, gisaway ni Robredo ang gubat kontra druga kay daghan na kaayo ang nangamatay apan wa gihapon masumpo. Napikon ang pangulo ug gihagit siya nga mangulo sa kampanya kontra druga. Niadtong Oktubre 31, gipirmahan sa pangulo ang appointment ni Robredo isip drug czar.
***
Managlahi ang ihap sa nangamatay sa illegal nga drugas. Ang kapulisan niingon nga mokabat sa 6,000 ka mga suspetsado sa illegal nga drugas ang napatay atol sa mga operasyon. Apan ang mga human rights group niingon nga miabot na kini sa 20,000.
Matod ni Robredo, ang pagpatay sa drug suspects gawas sa rule of law. Busa usbon ang inihapay, matod niya. Imbis mga patay maoy iphon, ang iphon kadtong nga kinabuhi nga nausab ug niumento pinaagi sa rehabilitasyon ug edukasyon.
Usbon usab ang target gikan sa demand side kon niadtong mga tiggamit ug tigpayuhot sa illegal nga drugas ug adto na kini ipunting sa supply side, sa tinubdan sa illegal nga drugas dinhi sa Pilipinas. Gitawag kini nga supply constriction.
***
Si Senador Panfilo “Ping” Lacson niingon nga kinahanglang magbantay si Robredo sa iyang buko-buko sa pagpatuman sa kampanya sa pagpakunhod sa supply sa illegal drugs sa nasod.
Si Lacson, usa ka kanhi hepe sa Philippine National Police, niingon nga morekomendar siya og mga retirado ug aktibong mga opisyal nga motabang kang Robredo kay kinahanglan nga dunay pundok sa mga tawo nga iyang kasaligan.
Daghan ang mga “character” sa kalibotan nga gisudlan ni Robredo, matod ni Lacson.