MAG-UUMA nga paingon unta magbantay sa doul na nga harvest sa humay ang gi shotgun sa laing mag-uuma mga alas 11:30 sa gabii niadtong Biyernes, Nobiyembre 8, sa P-7, Manubiray, Lampanusan, Kalilangan, Bukidnon.
Giila ang biktima nga mao si Johny A. Balasa, 36, minyo, residente sa dapit.
Gitumbok nga suspetsado mao si Apolonio Donguines, 47, minyo, residente sa dapit.
Sa inisyal nga imbestigasyon sa Kalilangan Police Station, nasuta nga samtang pabaklay ang biktima paingon sa iyang umahan aduna kini kaugalingong dala nga shotgun aron mobantay sa mga humay nga bag-ohay lang gi-harvest.
Apan, giatngan na kini sa suspetsado ug gipusil kini gamit ang shotgun.
Bout pa sa biktima nga mobalos apan paspas kining gipusil sa suspek hinungdan nakaangkon kini og samad sa iyang dughan ug ulo.
Na-recover pa sa crime scene ang shotgun gipanag-iyahan sa biktima ug guba nga magazine gitouhang gipanag-iyahan sa suspek nga misibat human sa insidente.
Gidala pa ang biktima sa balay tambalanan sa dapit apan dead on arrival nga gideklar ni Dr. Glayness Montejo.
Gikareport nga nagdumot ang suspek sa biktima human aduna kini sila daan bangi sa yuta.
Giingon pa sa pamilya sa biktima nga nagtio silang okay na ang tanan apan padayon daw diay sa pagdumot ang suspek.