NITAROY pa sa iyang liog nga gitouhang nilahos sa kasing-kasing sa usa ka driver ang kutsilyo dihang giluba niini iyang kaugalingon nga nadiskubre Sabado sa alas 4:30 sa kadlawon sa Sabado, Nobiyembre 9, sa P2 Poblacion, Kitaotao, Bukidnon.
Giila ang biktima nga mao si Ceperino C. Auxtero, 50, minyo, residente sa susamang dapit.
Si Police Chief Master Sergeant Julius F. Doring kinsa imbestigador sa Kitaotao Municipal Station nibutyag sa SunStar Superbalita nga wala silay nakitang foul play sa kamatayon sa biktima.
Matud niini, basi sa ilang inisyal nga imbestigasyon nga una na nga misuway og hikog si Ceperino ug gitouhang tungod kay ang negosyo nila mao kining pagparenta sa ilang gipanag iyahang elf nga kini mao gihapon mag-drive.
Garentahan kini sa dapit ug kasikbit panahon adunay kasal, lubong ug uban pang aktibidades apan human gibawal na kining sakyan ug gidili na sa dapit giingong gibati niini ang kagoul labina daw aduna pay monthly nga balayrunon ang elf.
Matud sa imbestigador nga dili unta angayan niini huna-hunaon kay makabayad man gihapon kini sila basi sa sugilon sa asawa.
Atol sa insidente, tapad pa ang magtiayon apan kadlawon minaog ang asawa aron timplahan kini og gatas.
Nakainom pa kini apan pagbalik sa asawa, mao na naabtan niini nga nagtaroy na ang kutsilyo sa liog sa biktima ug nadut-an halos milahos sa kasing-kasing.
Gitabang pa kini ug gidala sa Municipal Health Unit sa dapit apan gideklarar nga dead on arrival.