DUL-AN tunga sa milyon nga kantidad sa mga kahoy ang nakumpiska sa kapulisan uban sa Department of Environment and Natural Resources (DENR) atol sa gipahigayong anti-illegal logging niadtong Sabado, Nobiyembre 9, mga alas 2:30 sa kaadlawon sa Sitio Pahiron, Barangay Lumbia, dakbayan sa Cagayan de Oro.
Sikop si Arnel Tabobo, 39, minyo ug helper nga si Cristito Daugan, 40, dunay kaipon ug pulos residente sa Barangay Tignapoloan ning dakbayan.
Sa pakighinabi sa hepe sa Police Station (PS) 9 sa Barangay Lumbia PCapt Teodoro De Oro, giingong si Tabobo mismo ang tag-iya niini gani duna na kini susamang kaso kaniadto.
Walay napakita nga mga dokumento ang maong mga dinakpan.
"Iyang istorya gipakarga ra daw na sa iyaha. Trucking ra daw iyaha pero siya may tag-iya gyud ani kay naa naman siya’y kaso daan pud, mao gihapon pareho ra," matud ni De Oro.
Gipanghimakak usab niini nga iyang helper si Daugan ug igo lang nga nakisakay niya.
"Murag iya rang helper. Iyang ingon nang-hitch pero imposible kaayo alas 2:00 sa kaadlawon," dugang pa.
Nakuha ang ubay-ubay ka mga kahoy sama sa 25 ka buok nga lauan (595.47 board feet) ug pito ka gemilina nga kahoy (155.64 board feet) nga gibanabanang anaa sa P391,953.20 ang kantidad diin dalhon unta kini diha sa may Iponan.
Lakip usab sa gikumpiska sa kapulisan ang gikargahan sa maong mga kahoy nga Kia Bongo nga kolor green nga nagdala sa numero sa plaka nga FHZ-683.