MASULOB-ONG taho ang mikaylap sa Sugbo kagahapon, Dominggo, Nobiyembre 10, tungod sa pagtaliwan na sa laing kinabuhi sa inilang negosyante nga Sugbuanon nga si John Gokongwei, Jr. kinsa gideklarar nga patay na sa alas 11:41 sa gabii niadtong Sabado, Nobiyembre 9, sa Manila Doctor’s Hospital nga gipalibotan sa iyang minahal sa kinabuhi.
Atong dakong pagyukbo sa Sugbuanon nga magpapatigayon nga nahimong ehemplo sa pag-antos ug pagkugi nga naghimo kaniya nga usa sa labing adunahang tawo sa nasod ug Asya gikan sa kakabus nga kahimtang.
Natawo siya sa China apan dinhi na sa Sugbo nagtubo. Dihang nag-edad pa lang 13 anyos, naningkamot siya sa pagpaninda og mani, sabon ug kandila sa dalan Colon sa pagtabang sa ilang pamilya human sa kamatayon sa iyang amahan nga si John Gokongwei, Sr.
Tungod sa iyang walay pagkupas nga kakugi, nakapundar og mga negosyo sa Sugbo ug ngadto sa kaulohan. Siya maoy founder sa conglomerate nga J.G. Summit Holdings Inc. Niretiro sa pagdumala sa negosyo niadtong 2016 ug gipasa ang liderato sa iyang bugtong anak nga lalake nga si Lance. Siya dunay lima ka mga anak.
Siya maoy ikatulo nga labing adunahan sa Pilipinas, uban sa kasamtangang net worth nga $5.8 bilyunes base sa Nobiyembre 9, 2019 talaan, sumala sa Forbes Magazine. Pipila sa iyang inilang negosyo mao ang Robinsons malls ug supermarkets, Cebu Pacific ug daghan pang dagkong kompaniya.
Dili malimtan sa mga Sugbuanon ang dakong natabang sa amahang Gokongwei sa ekonomiya sa Sugbo lakip na sa paghatag og dungog isip Sugbuanon sa natad sa pamatigayon sa sulod ug gawas sa nasod.
Nitaliwan si Gokongwei, Jr. apan nagpabiling buhi ang iyang mga legasiya. Idolo ug ehemplo. Gipamatud-an nga ang kakabus mahimong temporaryo lamang uban sa pagpaningkamot.